PËRDITËSIM: Takimi i parë trepalësh në Bruksel për Komisionin e Personave të Zhdukur, BE jep detaje të reja

Kryenegociatorët e Kosovës dhe Serbisë, së bashku me Përfaqësuesin Special të Bashkimit Evropian (EUSR), janë takuar të enjten, më 22 janar, për herë të parë në format trepalësh në kuadër të Komisionit të Përbashkët për Personat e Zhdukur në Bruksel.

Lajmi është konfirmuar përmes njoftimit zyrtar të Bashkimit Evropian. Ky komision u dakordua nga presidenti serb Aleksandar Vuçiq dhe kryeministri i Kosovës Albin Kurti në Deklaratën për Personat e Zhdukur më 2 maj 2023, gjatë një takimi të nivelit të lartë të lehtësuar nga Përfaqësuesja e Lartë e BE-së.

“Objektivi i Komisionit të përbashkët është të mbikëqyrë zbatimin e Deklaratës për Personat e Zhdukur, e cila synon të kontribuojë në zbardhjen e fatit të personave të zhdukur, përfshirë personat e zhdukur me forcë, të sigurojë mbyllje të çështjes për familjet e tyre dhe të nxisë pajtimin dhe paqen e qëndrueshme.”

Në përputhje me Termat e Referencës të dakorduar më 17 dhjetor 2024, Komisioni do të mbështesë Grupin e Punës për Personat e Zhdukur të kryesuar nga Komiteti Ndërkombëtar i Kryqit të Kuq (KNKK), duke lehtësuar zbatimin, zgjidhjen e mosmarrëveshjeve dhe vlerësimin e progresit.

Palët, lehtësuesi i BE-së ose KNKK-ja mund të referojnë çështje në Komision për interpretimin e Deklaratës. Vendimet do t'i kthehen Grupit të Punës për miratim.

“BE-ja pret shumë që Komisioni i Përbashkët të japë një kontribut të rëndësishëm në sqarimin e fatit të të zhdukurve dhe në ndihmën për mbylljen e një kapitulli të dhimbshëm për familjet.”

Peter Sorensen, Përfaqësuesi Special i BE-së për dialogun Kosovë-Serbi, e ka vlerësuar këtë takim si hap të rëndësishëm drejt zbardhjes së fatit të personave të zhdukur.

Rëndësia dhe pritshmëritë

Ky zhvillim shënon progres në dialogun Kosovë-Serbi, duke u fokusuar në çështje humanitare. Familjet presin mbyllje pas dekadash pritjeje.