“Plisat” hedhin gjësende në parket, ndërpritet ndeshja Ylli – Prishtina
Ndeshja e basketbollit mes Golden Eagle Yllit dhe KB Prishtinës u ndërpre pas vetëm shtatë minutave lojë pasi tifozët e Prishtinës, të njohur si “Plisat”, hodhën objekte në parket si shenjë pakënaqësie ndaj emërimit të Bekë Berishës si president.
Ndeshja mes Golden Eagle Yllit dhe KB Prishtinës në kuadër të Superligës së Basketbollit të Kosovës është ndërprerë pas vetëm shtatë minutave lojë.
Tifozët e Prishtinës, të njohur si “Plisat”, hodhën gjësende në parket, duke detyruar gjyqtarin të suspendojë përkohësisht lojën.
Protesta erdhi si pasojë e pakënaqësisë së tifozëve me vendimin e bordit të KB Prishtinës për ta emëruar Bekë Berishën si president të ri të klubit. Kujtojmë se më herët ne kemi raportuar për këtë zgjedhje, e cila u kundërshtua edhe nga Ministria e Kulturës, Rinisë dhe Sportit (MKRS).
Në momentin e ndërprerjes, Ylli kryente me epërsi të madhe prej 9 pikësh, me rezultat 17-8, duke pasur edhe 3 minuta e 12 sekonda për të mbyllur çerekun e parë.
Mbetet për t’u parë se si do të zhvillohet situata në vazhdim dhe nëse ndeshja do të rifillojë ose do të ketë pasoja të mëtejshme.
/Burimi: Telegrafi