Policia e Kosovës lançon versionin e ri të aplikacionit ‘Lajmëro Policinë’: Raportim me video dhe për iOS

Siguria publike fillon me një veprim të vogël, por të rëndësishëm. Policia e Republikës së Kosovës ka lançuar versionin e ri dhe të përditësuar të aplikacionit mobil ‘Lajmëro Policinë’, i cili tani është më modern, më funksional dhe shumë më i lehtë për t’u përdorur.

Ky version i ri u mundëson qytetarëve të raportojnë rastet edhe përmes videove, të ndjekin statusin e raportit të tyre në kohë reale, dhe për herë të parë, aplikacioni është i disponueshëm edhe për përdoruesit e iPhone në platformën iOS.

Policia e Kosovës garanton se të gjitha raportimet e qytetarëve përmes këtij aplikacioni mbeten plotësisht konfidenciale, duke mbrojtur privatësinë dhe sigurinë e të dhënave personale.

Aplikacioni ‘Lajmëro Policinë’ mund të shkarkohet falas në të gjitha pajisjet që mbështesin platformat Android dhe iOS, duke e bërë procesin e raportimit më të shpejtë dhe më efikas se kurrë më parë.

Me vetëm disa klikime, qytetarët mund të kontribuojnë drejtpërdrejt në rritjen e sigurisë në komunitetin e tyre. Kërkoni ‘Lajmëro Policinë’ në Google Play Store ose Apple App Store.

“Siguria është përgjegjësi e përbashkët.”

Bashkëpunimi mes qytetarëve dhe Policisë së Kosovës është kyç për një Kosovë më të sigurt.