Pren Kaçinari denoncon uzurpimin e pronës 20 mijë metra katrorë nga qiraxhiu në Prizren

Pren Kaçinari ka dalë hapur për të denoncuar atë që ai e quan uzurpim të paligjshëm të pronës së tij prej rreth 20 mijë metra katrorë në Prizren. Sipas tij, pronën e kishte dhënë me qira për tre vjet, por pas skadimit të kontratës më 30 dhjetor 2024, qiraxhiu nuk e ka liruar hapësirën.

"Në vitin 2024 me 30.12 ka skadu kontrata, edhe unë nuk kam ardhë deri kur ka skadu këtu afati i kontratës [...] Kur vi e shoh personin që nuk e njoh fare [...] Unë jam vëllai i Sefës, por unë me të nuk kisha kontratë", - ka thënë Kaçinari për Burim Pacollin në emisionin e Nacionale.

Kaçinari shton se ka dhënë kohë shtesë qiraxhiut për shkak të një marrëveshjeje me GIZ-in, por edhe pas 15 ditësh, ai nuk e ka liruar pronën. Sipas tij, kjo pronë ka vlerë të jashtëzakonshme për shkak të potencialit për ndërtime të larta.

“"Unë jam marrë vesh me ndërtues, me përqindje me krejt, masi është kry krejt kemi pasë me bë kontratë [...] Aty kam humbje, se këtu janë diku rreth 20 mijë metra katrorë, merre me mend sa është vlera e saj””

Nga Gjykata Themelore në Prizren, zëdhënësi Marcel Lekaj ka konfirmuar se po zhvillohen dy procedura kontestimore në Divizionin Civil. "Për këtë kontest, pala Pren Kaçinari ka paditur palën Gazmend Fetoshi ku kërkon lirimin e pronës, por për këtë lëndë nuk është zhvillu ende një seancë”, - ka thënë Lekaj.

Rasti nxjerr në pah probleme të shpeshta me uzurpimin e pronave në Kosovë, ku kontratat e qirasë shpesh kalojnë në mosrespektim të afateve ligjore, duke kërkuar ndërhyrjen e gjykatave.