Prokurimi publik dhe rekrutimi, sektorët më të rrezikuar nga korrupsioni në Kosovë: Flet drejtori i APK-së, Yll Buleshkaj
Drejtori ekzekutiv i Agjencisë për Parandalimin e Korrupsionit (APK), Yll Buleshkaj, ka identifikuar prokurimin publik dhe rekrutimin si zonat më të rrezikuara nga korrupsioni në Kosovë, duke shpjeguar se këto sektorë përfshijnë pjesë të mëdha të buxhetit shtetëror dhe mund të favorizojnë biznese të caktuara.
Prokurimi publik dhe rekrutimi, zonat më të rrezikuara nga korrupsioni
Drejtori ekzekutiv i Agjencisë për Parandalimin e Korrupsionit (APK), Yll Buleshkaj, ka deklaruar se prokurimi publik dhe rekrutimi vazhdojnë të jenë ndër sektorët më të rrezikuar nga korrupsioni në Kosovë.
Sipas tij, këto fusha implikojnë një pjesë të madhe të buxhetit shtetëror dhe vendimmarrjen e zyrtarëve publikë, e cila shpesh mund të favorizojë operatorë të caktuar në tendera.
“Prokurimi publik konsiderohet një ndër sektorët më me rrezik, së bashku me rekrutimin, sepse këta sektorë përveç që janë ku një pjesë tepër e madhe e buxhetit të Kosovës prokurohet përmes këtyre shërbimeve, edhe vendimmarrja e zyrtarëve të përfshirë mund të jetë problematike.”
Buleshkaj ka bërë të ditur se vitin e kaluar, APK-ja ka dërguar mbi 150 raste në prokurori, kryesisht për deklarimin e pasurisë, konfliktin e interesit dhe përfitimet financiare të zyrtarëve.
“Në secilin rast që ne e vërtetojmë që ka pasur përfitime potenciale financiare për veten, për zyrtarin apo për të afërmit e tyre, ne jemi të obliguar sipas ligjit të dorëzojmë kallëzim penal në prokurorinë e vendit.”
Ai ka përmendur raste specifike ku janë identifikuar shuma të larta, mbi 1 milionë euro, të përfshira në anomalitë e tenderëve publikë.
Sa i përket verifikimit të deklaratave të pasurisë, APK-ja është në fazën përfundimtare, ku janë verifikuar rreth 2 mijë zyrtarë dhe familjarët e tyre, me disa ministra, deputetë dhe udhëheqës ende në komunikim për shpjegime.
“Jemi në fund të procesit të verifikimit të pasurisë. Kanë qenë rreth 2 mijë të cilët ju janë nënshtruar, duke shtuar këtu edhe familjarët e tyre.”
Buleshkaj ka evituar të konfirmojë apo mohojë verifikimin e pasurisë së presidentes Vjosa Osmani, duke thënë se ligjërisht nuk mund të deklarohet për rastet në proces.
APK-ja gjithashtu ka trajtuar ankesa nga kompani të huaja për tenderë, por ka theksuar se procedurat nuk janë pengesë kryesore për investimet, dhe Kosova ka qenë lider në rajon me sistemin elektronik të prokurimit.
“Kosova është shteti i parë në rajon që ka përdorur sistemin elektronik të prokurimit, do të thotë jemi, kemi qenë lider.”
Ai ka nënvizuar nevojën për edukimin e qytetarëve kundër perceptimit të korrupsionit, i cili ndikon negativisht në zhvillimin ekonomik edhe kur luftohet.