Prokuroria Themelore e Prishtinës nis hetime paraprake për manipulime me vota në Obiliq

Prokuroria Themelore e Prishtinës, Departamenti për Krime të Rënda, ka njoftuar se po e ndjek me vëmendje të shtuar procesin e rinumërimit të votave për zgjedhjet e përgjithshme të mbajtura më 28 dhjetor 2025.

Gjatë këtij procesi në komunën e Obiliqit janë vërejtur dyshime për mospërputhje në rezultatet e kandidatëve për deputetë pas përfundimit të numërimit.

Prokurori i Shtetit ka lëshuar autorizim për Policinë e Kosovës që të fillojë hetimet paraprake për të verifikuar saktësinë e rezultateve dhe për të përcaktuar nëse ka pasur shkelje ligjore nga persona të përgjegjshëm.

“Prokuroria Themelore e Prishtinës, Departamenti për Krime të Rënda, njofton opinionin publik se po ndjek me vëmendje të plotë procesin e rinumërimit të votave për zgjedhjet e përgjithshme të mbajtura më 28 dhjetor 2025. Gjatë këtij procesi, ka dyshime se janë vërejtur mospërputhje në rezultatet e kandidatëve për deputet pas përfundimit të numërimit të votave në komunën e Obiliqit. Në këtë drejtim, Prokurori i Shtetit ka lëshuar autorizim për Policinë e Kosovës që të fillojë hetimet paraprake, me qëllim verifikimin e saktësisë së rezultateve dhe përcaktimin nëse ka pasur shkelje të mundshme nga personat përgjegjës. Prokuroria Themelore në Prishtinë mbetet e angazhuar në mbrojtjen e votës së lirë të qytetarëve dhe trajtimin e çdo rasti të dyshuar, me synimin e ruajtjes së integritetit të procesit zgjedhor dhe sundimit të ligjit.”

Ky zhvillim vjen në kontekstin e procesit të rinumërimit të votave, ku janë evidentuar parregullsi në disa komuna, duke ngritur shqetësime për integritetin zgjedhor. Prokuroria thekson angazhimin për mbrojtjen e votës së lirë.