Protesta e PDK-së tensionohet, 11 efektivë policie të lënduar nga molotovë dhe piroteknikë

Policia e Kosovës ka dalë me një njoftim zyrtar pas protestës së organizuar nga Partia Demokratike e Kosovës (PDK) këtë të shtunë në Prishtinë. Situata u tensionua seriozisht para Kryeministrisë dhe sallës së Kuvendit, ku protestuesit përdorën mjete të rrezikshme si molotovë, lëndë piroteknike dhe sende të forta.

Sipas njoftimit të Policisë së Kosovës, si pasojë e këtyre sulmeve, 11 punonjës policie kanë pësuar lëndime dhe po marrin trajtim mjekësor në Spitalin e Traumës dhe repartin e djegieve.

“Gjatë tubimit të sotëm, të thirrur dhe organizuar nga Partia Demokratike, si pasojë e sulmeve me molotov, lëndë piroteknike dhe sende të forta para Kryeministrisë dhe sallës së Kuvendit, janë dëmtuar dhe po marrin ndihmë mjekësore 11 punonjës policie, të cilët ishin në krye të detyrës për mbarëvajtjen dhe garantimin e protestës.”

Policia thekson se efektivët e saj ishin të angazhuar për garantimin e sigurisë së protestës, por situata u përshkallëzua nga veprimet e disa protestuesve. Gjithashtu raportohet se disa protestues kanë mbetur të lënduar në përplasje.

Protesta e PDK-së erdhi në një kontekst të tensionuar politik, ku opozita ka shprehur pakënaqësi ndaj qeverisë aktuale. Policia ka ftuar qytetarët të respektojnë ligjin dhe të shmangin dhunën në manifestime.

Digjital.com do të vijojë të ndjekë zhvillimet e mëtejshme të kësaj situate.