Publikohet lista e barnave në Barnatoren Qendrore të QKUK-së: Transparencë më e madhe në shëndetësi

Shërbimi Spitalor Klinik dhe Universitar i Kosovës (ShSKUK) ka marrë një hap të rëndësishëm drejt transparencës institucionale duke publikuar listën e plotë të barnave dhe materialeve medicinale të disponueshme në stok.

Ky njoftim është bërë në përgjigje të kërkesës së Bordit të ShSKUK-së nga Shërbimi Klinik Farmaceutik. Listat janë postuar në ueb-faqen zyrtare të ShSKUK-së më 20 dhjetor 2025.

Përmbajtja e listave përfshin barnat dhe materialin medicinal në Barnatoren Qendrore të QKUK/ShSKUK-së, si dhe në klinikat e ndryshme përkatëse.

““Lista e stokut farmaceutik përditësohet fillimisht në baza mujore, ndërsa ShSKUK është duke punuar që sapo të krijohen kushtet teknike ky përditësim të bëhet në baza javore, me qëllim të rritjes së transparencës dhe informimit të saktë të publikut.””

Ky veprim është pjesë e përpjekjeve për të rritur besimin e qytetarëve në sistemin shëndetësor publik, duke i mundësuar atyre të dinë saktësisht çfarë barnash janë të disponueshme në spitale.

Përditësimi i listave në baza mujore, me synim javore, do të ndihmojë në informimin e vazhdueshëm të publikut dhe menaxhimin më efikas të burimeve mjekësore.