Rasim Demiri mohon se djali i tij është arrestuar për dallaveri me vota në Prizren
Media sot kanë raportuar se Alaudin Demiri, djali i përfaqësuesit të Koalicionit Vakat, Rasim Demiri, është mes të arrestuarve në aksionin policor në Prizren për dyshime të manipulimeve me vota. Demiri ka mohuar informacionin, duke thënë se drejtësia do të thotë fjalën e vet.
Në media është raportuar sot se në mesin e të arrestuarve nga aksioni i Policisë së Kosovës dhe Prokurorisë në Prizren është edhe Alaudin Demiri, djali i Rasim Demirit, përfaqësues i Koalicionit Vakat.
Indeksonline e ka kontaktuar Rasim Demirin për të marrë versionin e tij lidhur me këtë ngjarje.
“Nuk është ashtu. Drejtësia ka me e tregu fjalën e vet. Nuk e di nëse është i arrestuar, por është në proces.”
Rasim Demiri, i cili është përfaqësues i Koalicionit Vakat, koalicion i partive boshnjake në Kosovë, ka dhënë këtë përgjigje të shkurtër, duke lënë hapësirë për zhvillime të mëtejshme nga drejtësia.
Aksioni policor në Prizren vjen në kontekstin e hetimeve për parregullsi në zgjedhjet e fundit lokale, ku dyshohet për dallaveri me vota.