Rexhepi: Ka komunikim për formimin e qeverisë së re, presim rinumërimin e votave

E ftuar në emisionin Debat Plus, deputetja nga Partia e Re Demokratike (PRD), Emilja Rexhepi, ka zbuluar se ekzistojnë komunikime për negociatat e formimit të qeverisë së re në Kosovë.

Ajo theksoi se po pritet përfundimi i procesit të rinumërimit të votave nga KQZ-ja, para se të nisin bisedimet konkrete për shpërndarjen e posteve në ekzekutiv.

““Normalisht unë kam folur edhe me kryeministrin pak edhe për rezultatet e zgjedhjeve dhe presim rinumërimin e votave edhe me u ulë e fol për pozitën edhe ne qeverinë e re””

Rexhepi ka zhvilluar biseda me kryeministrin në detyrë, Albin Kurti, lidhur me rezultatet e zgjedhjeve të 28 dhjetorit 2025.

Përfaqësim më i mirë për komunitetet joshumicë

Rexhepi vlerësoi qeverinë e kaluar për hapësirën më të madhe të dhënë komuniteteve joshumicë. Ajo rikujtoi se më parë vetëm komuniteti serb kishte zëvendëskryeministër, ndërsa tani përfaqësimi ka qenë më i gjerë.

““Qeveria e kaluar ka pasur një hapësirë shumë të madhe për komunitetet joshumicë. Më herët vetëm komuniteti serb kishte zëvendëskryeministër, ndërsa tani ka pasur më shumë autonomi dhe hapësirë për të ndihmuar komunitetet që jetojnë në Kosovë””

Ajo nuk po flet për pozita personale, por për rolin institucional të këtyre komuniteteve. Rexhepi theksoi se askush nuk mund të shantazhohet apo detyrohet të veprojë kundër vullnetit të tij.

Ajo ka votuar kundër nismave në Kuvend kur ato nuk garantonin barazi të plotë për komunitetet.

Konteksti i zgjedhjeve dhe rinumërimit

Pas zgjedhjeve të parakohshme të 28 dhjetorit, LVV ka fituar shumicën, por procesi i rinumërimit ka zbuluar parregullsi në disa komuna si Prizreni dhe Malisheva. Kjo ka ngadalësuar formimin e institucioneve të reja.