PËRDITËSIM: Ardita Sinani çmon lart legjislacionin në DASH për diskriminimin e shqiptarëve në Luginë
Kryetarja e Preshevës, Ardita Sinani, ka vlerësuar lart legjislacionin e propozuar në Kongresin amerikan nga Keith Self, duke e cilësuar si hapin më të fuqishëm politik deri tani. Kjo pas miratimit në komitet të rezolutës H.R. 6411 që udhëzon DASH-in të vlerësojë diskriminimin ndaj shqiptarëve në Luginën e Preshevës.
PËRDITËSIM: Ardita Sinani çmon lart legjislacionin në DASH për diskriminimin e shqiptarëve në Luginë
Nga Capitol Hill në Washington, zëri i shqiptarëve të Luginës së Preshevës po dëgjohet më fort se kurrë. Kongresmeni Keith Self, kryetar i Nënkomitetit për Evropë, ka prezantuar rezolutën H.R. 6411, e cila ka marrë miratimin e Komitetit për Punët e Jashtme. Kjo udhëzon Departamentin e Shtetit (DASH) të vlerësojë diskriminimin sistematik ndaj shqiptarëve në Preshevë, Medvegjë dhe Bujanoc.
Ish-deputeti Faton Bislimi ka njoftuar këtë zhvillim të rëndësishëm, duke theksuar mbështetjen bipartizane nga Brian Mast dhe Gregory Meeks.
“Ditë të bardhë për shqiptarët dhe një sinjal të qartë për çdo regjim që mendon se padrejtësia mund të zgjasë pafund.”
Kryetarja e Preshevës, Ardita Sinani, ka cilësuar këto zhvillime si tejet pozitive dhe jo të rastësishme, produkt i angazhimit shumëvjeçar të Kosovës, Shqipërisë dhe diasporës shqiptare në SHBA.
“Legjislacioni i prezantuar dhe i miratuar në Komitetin për Punë të Jashtme të Kongresit Amerikan përbën deri më tani hapin më të fuqishëm politik dhe institucional, sepse e shndërron çështjen e diskriminimit të shqiptarëve në Luginë në qëndrim zyrtar të Shteteve të Bashkuara.”
Sinani thekson rolin vendimtar të shqiptarëve në SHBA, Liga Qytetare Shqiptaro-Amerikane dhe lobimin e vazhdueshëm në Kongres, Senat, DASH, BE dhe Bundestag. Ajo rikujton se diskriminimi daton nga 1989-1990 me përjashtim sistematik në arsim, punësim dhe spastrim etnik të heshtur.
“Diskriminimi ndaj shqiptarëve të Luginës së Preshevës nuk ka filluar dje, por daton që nga vitet 1989–1990... Shkeljet kanë qenë të vazhdueshme, sistematike dhe të qëllimshme.”
Kongresmeni Self e njeh mirë situatën, duke e cilësuar pasivizimin e adresave si mekanizëm përjashtues dhe duke i parë shqiptarët si komunitet autokton. Sinani falënderon bashkëpunimin me mërgatën shqiptare në SHBA për internacionalizimin e çështjes.
Pritet që ky legjislacion të ketë efekte praktike, duke ndaluar praktikat diskriminuese dhe duke përmirësuar jetën e shqiptarëve në Luginë.