PËRDITËSIM: Rezervat Shtetërore: Mbyllet seanca ndaj Rozeta Hajdarit, përplasje për dokumentet sekrete
Gjykata në Prishtinë ka vendosur të mbyllë procesin gjyqësor për 'Rezervat Shtetërore' për publikun, duke u thirrur në ruajtjen e sekretit shtetëror dhe mbrojtjen e dëshmitarëve. Ministrja Rozeta Hajdari dhe tre të tjerë akuzohen për dëm 2.9 milionë euro.
Mbyllet për publikun seanca ndaj Rozeta Hajdarit, shkak dokumentet e klasifikuara
Gjykata Themelore në Prishtinë ka marrë vendim që seanca e shqyrtimit fillestar në rastin e njohur si “Rezervat shtetërore” të mbahet e mbyllur për publikun. Në këtë proces, krahas ministres në detyrë të Industrisë, Ndërmarrësisë dhe Tregtisë, Rozeta Hajdari, të akuzuar janë edhe Irfan Lipovica, Hafiz Gara dhe Ridvan Muharremi.
Vendimi i gjyqtarit Avni Syla erdhi pas një debati të tensionuar mes prokurorisë dhe mbrojtjes lidhur me qasjen në dokumentet që konsiderohen sekret shtetëror.
Përplasjet për sekretin shtetëror
Prokurori Special, Valdet Gashi, fillimisht propozoi që seanca të ishte e hapur, me përjashtim të momenteve kur diskutohen pjesët sekrete të aktakuzës. Megjithatë, ky propozim u kundërshtua ashpër nga mbrojtja e të akuzuarve.
Avokati i ministres Hajdari, Florent Latifja, theksoi se procesi përfshin materiale të klasifikuara për të cilat as mbrojtja e as policët hetues nuk kanë pasur certifikata të sigurisë për qasje. \"Kemi të bëjmë me sekret shtetëror, ku as ne avokatët, as bashkëpunëtorët e prokurorit nuk kemi pasur të drejtë qasjeje. Propozoj që seanca të mbahet e mbyllur për të shmangur pasojat penale nga trajtimi i dokumenteve të klasifikuara,\" deklaroi Latifja.
“Këto dokumente kanë kaluar në duar të personave pa certifikata sigurie dhe tani tentohet të vazhdohet në një proces që mund të ketë pasoja penale për të gjithë ne.”
Edhe avokatët e të akuzuarve të tjerë, Florim Malaj dhe Nazim Mehmeti, ngritën shqetësime të ngjashme. Sipas Malajt, e gjithë dosja është e klasifikuar dhe nuk mund të bëhet ndarje e thjeshtë mes pjesëve të hapura dhe të mbyllura të seancës pa u bërë më parë deklasifikimi i saj sipas ligjit.
Vendimi i Gjykatës
Pas dëgjimit të palëve, gjyqtari Avni Syla konstatoi se janë përmbushur kushtet ligjore për mbylljen e seancës. Ai arsyetoi këtë vendim me nevojën për ruajtjen e konfidencialitetit të informacionit dhe mbrojtjen e dëshmitarëve në këtë çështje sensitive.
Rasti i rezervave shtetërore lidhet me dyshimet për keqpërdorime gjatë blerjes së grurit dhe vajit, ku sipas prokurorisë, buxheti i shtetit është dëmtuar për rreth 2.9 milionë euro.
