Serbia duhet të akuzohet për krimet e gjenocidit në Kosovë – Përkujtohen mbi 10 mijë viktima civile

Në Ferizaj, me rastin e Ditës së Përkujtimit të Viktimave të Gjenocidit më 15 janar, u organizua një ceremoni solemne ku u ndezën mijëra qirinj në nderim të mbi 10 mijë civilëve të vrarë nga forcat serbe gjatë luftës së fundit në Kosovë (1998-1999).

Aktiviteti u zhvillua nga Qendra “Gjenocidi në Kosovë – Plagë e Hapur” dhe OVL UÇK – Dega Ferizaj, në bashkëpunim me Shoqatat e Familjeve të Dëshmorëve dhe Invalidëve të UÇK-së, të Burgosurve Politikë, të Pagjeturve, shoqatën “Çamëria” dhe Institutin e Krimeve të Kryera gjatë Luftës në Kosovë.

Kërkesë për lulëkuqen si simbol zyrtar

Zëvendëskryetari i Qendrës, Adnan Asllani, theksoi se kanë bërë kërkesë zyrtare te institucionet që lulëkuqja të aprovohet si simbol i përkujtimit të viktimave, por ende nuk kanë marrë përgjigje.

“Fjala është për të gjitha viktimat, për 10 mijë civilët e vrarë dhe për gjithë ato viktima të gjenocidit që i ka shkaktuar shteti serb gjatë luftës së fundit në Kosovë. Kujtojmë se Parlamenti i Kosovës më 16 maj të vitit 2019 ka miratuar një rezolutë përmes së cilës ka caktuar datën 15 janar si ditë e përkujtimit të viktimave të gjenocidit. Data 15 janar përkon me aktet më të tmerrshme gjenocidale, si masakra e Reçakut.”

Serbia, shtet gjenocidal, duhet të akuzohet

Kryetari i Qendrës, Bujar Dugolli, deklaroi se krimet serbe në Kosovë janë të dokumentuara mirë si në nivel kombëtar ashtu edhe ndërkombëtar, duke u bërë thirrje për akuzimin e Serbisë si shtet përgjegjës për gjenocidin.

“Siç dihet, projektet e gjenocidit dhe gjenocidi ndaj shqiptarëve të Kosovës në një periudhë 86-vjeçare kanë ndodhur katër herë. Periudha e fundit e zbatuar në Kosovë është periudha e luftës së fundit, 1998-1999. Kjo periudhë është më e dokumentuara... Pra, krimet e gjenocidit që kanë ndodhur në Kosovë në luftën e fundit janë të dokumentuara, gjë që është një bazë e fortë që Serbia, si shtet gjenocidal, të akuzohet për krimet që ka shkaktuar në Kosovë.”

Ky event theksoi nevojën për kujtim të vazhdueshëm, drejtësi dhe ruajtjen e historisë së tragjedisë kosovare gjatë Luftës së Dytë të Kosovës.