Shtëpia e Bardhë shpjegon mavijosjen e dorës së Trump në Davos: Goditje aksidentale ndaj tavolinës

Shtëpia e Bardhë ka reaguar të enjten për shenjën e dukshme të mavijosjes në dorën e majtë të presidentit amerikan Donald Trump, e vërejtur gjatë një ngjarjeje në Davos të Zvicrës.

Sipas një deklarate zyrtare, lëndimi është rezultat i një goditjeje aksidentale ndaj cepit të tavolinës së nënshkrimit gjatë organizimit të Bordit të Paqes.

““Në organizimin e Bordit të Paqes sot në Davos, presidenti Trump e goditi dorën në këndin e tavolinës së nënshkrimit, duke e shkaktuar mavijosjen e saj””

Një zyrtar i Shtëpisë së Bardhë shtoi se Trump është i ndjeshëm ndaj mavijosjeve për shkak të përdorimit të aspirinës, siç kanë konfirmuar mjekët e tij.

Fotografitë nga dita e mërkurë dhe mëngjesi i enjte nuk tregojnë shenja mavijosjeje, ndërsa ajo u bë e dukshme rreth 10 minuta më vonë, gjatë nënshkrimit të dokumenteve.

Trump ka pasur më parë mavijosje në dorën e djathtë, të cilat ka tentuar t'i fshehë me makijazh dhe fasha. Një incident i ngjashëm në dorën e majtë në fund të vitit të kaluar kishte ngritur pyetje për shëndetin e tij.

Burimi: Nacionale