Sorensen: 2026-ta të sjellë rezultate të prekshme në dialogun Kosovë-Serbi
Emisari i BE-së Peter Sorensen ka shprehur optimizëm pas takimeve në Kosovë me liderët vendorë, duke thënë se 2026 duhet të sjellë rezultate konkrete për qytetarët në dialogun me Serbinë.
Emisari special i Bashkimit Evropian për dialogun Kosovë-Serbi, Peter Sorensen, ka vizituar sërish Kosovën ku është takuar me presidenten Vjosa Osmani, kryeministrin në detyrë Albin Kurti dhe liderët e partive politike.
Në një postim në platformën X, Sorensen ka theksuar se diskutimet ishin të hapura për hapat e ardhshëm në dialogun e lehtësuar nga BE-ja, me shpresën që viti 2026 të sjellë rezultate të prekshme për qytetarët e Kosovës.
““I lumtur që jam kthyer në Kosovë! Pata takime të vlefshme dhe diskutime të hapura mbi hapat e mëtejshëm në dialogun e lehtësuar nga BE-ja për të siguruar që viti 2026 të sjellë rezultate të prekshme për popullin e Kosovës””
Sorensen ka nënvizuar gjithashtu se “angazhimi i vazhdueshëm mbetet thelbësor për përparimin në të ardhmen e Kosovës në BE”.
Kjo deklaratë vjen në kontekstin e përpjekjeve të vazhdueshme për normalizimin e marrëdhënieve mes Kosovës dhe Serbisë, ku Bashkimi Evropian luan rolin kryesor të lehtësuesit.
Vizita e Sorensenit nxjerr në pah nevojën për unitet politik në Kosovë për të arritur përparime konkrete deri në fund të dekadës.
