Tahiri: Ndërhyrja amerikane e ndali luftën në Kosovë, sa për OKB-në ajo do të vazhdonte
Edita Tahiri reagon ndaj Sekretarit të OKB-së, Guterres, duke kujtuar se pa ndërhyrjen amerikane lufta në Kosovë nuk do të ndalej kurrë.
Reagimi i Edita Tahirit pas deklaratave të Guterres për Iranin
Ish-zëvendëskryeministrja e Kosovës, Edita Tahiri, ka reaguar ashpër ndaj Sekretarit të Përgjithshëm të OKB-së, Antonio Guterres, lidhur me qëndrimet e këtij të fundit kundër ndërhyrjes amerikane në Iran. Tahiri ka përdorur shembullin e Kosovës për të argumentuar se pa ndërhyrjen e SHBA-ve, konfliktet e përgjakshme nuk do të ndaleshin nga mekanizmat e OKB-së.
Përmes një postimi në llogarinë e saj në Facebook, Tahiri ka theksuar se ishte pikërisht vendosmëria amerikane ajo që i dha fund luftës në Kosovë, ndërkohë që OKB-ja, sipas saj, do të lejonte vazhdimin e tragjedisë.
“Sikur të mos ishte ndërhyrja amerikane për ndaljen e luftës në Kosovë, sa për OKB-në lufta nuk do të ndalej, edhe përkundër tre rezolutave të Këshillit të Sigurimit që lejonin ndërhyrjen.”
Tahiri i ka cilësuar veprimet e fundit të administratës Trump në Iran si të domosdoshme për të parandaluar vrasjen e protestuesve që kërkojnë demokraci. Ajo u shpreh e "tronditur" me qasjen e Guterres, i cili u deklarua kundër ndërhyrjes me forcë.
Sipas ish-kryenegociatores së Kosovës, dështimi i OKB-së për të vepruar në raste kritike si ai i Kosovës është "një ndër arsyet kryesore pse duhet të ndryshojë rendi botëror". Ky reagim vjen në një kohë tensionesh të larta në Lindjen e Mesme, ku roli i SHBA-së po diskutohet sërish si faktor përcaktues për sigurinë globale.
