Tragjedi e madhe te Klubi i Tiranës: Vdes tragjikisht vajza e vogël e mesfushorit Freddy Alvarez

Klubi i Futbollit Tirana është zgjuar sot me një lajm tragjik. Mesfushori 30-vjeçar kostarikan, Freddy Alvarez, ka humbur vajzën e tij të vogël gjatë orëve të hershme të mëngjesit në Tiranë.

Të gjithë anëtarët e klubit janë të tronditur dhe kanë shprehur solidaritetin e plotë me lojtarin dhe familjen e tij. Njoftimi zyrtar erdhi nga faqja e tyre në rrjete sociale.

“Me dhimbje të thellë ndajmë lajmin se vajza e lojtarit tonë, Freddy Alvarez, ka ndërruar jetë tragjikisht në orët e para të mëngjesit të sotëm në Tiranë. I gjithë klubi ynë është i tronditur dhe në zi, duke qëndruar pranë Freddyt dhe familjes së tij në këtë moment të rëndë. Ngushëllimet tona më të sinqerta janë me familjen Alvarez. U prehtë në paqe.”

Alvarez, i cili ka mbërritur te Tirana kohët e fundit, po lufton me dhimbjen e madhe të humbjes së vajzës së tij. Klubi ka kërkuar privatësi për familjen në këto momente të vështira.

Kjo ngjarje e rëndë ka prekur të gjithë komunitetin sportiv shqiptar, duke dërguar mesazhe ngushëllimi për lojtarin dhe familjen e tij.