Trump trondit sërish: "Mund të më duhet të zgjedh mes NATO-s dhe Grenlandës"

Presidenti i Shteteve të Bashkuara, Donald Trump, ka lëshuar një deklaratë të fortë që ka rikthyer në qendër të vëmendjes ambiciet e tij për ishullin e Grenlandës dhe skepticismit të tij ndaj aleancës së NATO-s. Gjatë një interviste të fundit për New York Times, Trump sugjeroi se Uashingtonit mund t'i duhet të bëjë një zgjedhje të vështirë mes kontrollit të territorit arktik dhe ruajtjes së aleancës ushtarake perëndimore.

"NATO pa SHBA-në është pa forcë"

Trump nuk i ka kursyer kritikat për aleatët evropianë, duke theksuar se NATO do të ishte e pafuqishme pa lidershipin dhe fuqinë ushtarake të SHBA-së. Ai u shpreh se dëshiron që vendet evropiane të ndryshojnë qasjen e tyre ndaj mbrojtjes dhe financimit të aleancës.

"Mendoj se gjithmonë do të shkojmë mirë me Evropën, por dua që ata të ndryshojnë," tha Trump, duke shtuar se Rusia nuk është aspak e shqetësuar për asnjë vend tjetër të aleancës përveç Shteteve të Bashkuara.

“Morali im, mendja ime është e vetmja gjë që mund të më ndalojë. Nuk kam nevojë për ligjin ndërkombëtar.”

Grenlanda dhe ambiciet në Arktik

Rikthimi i kërkesës për Grenlandën, një territor autonom nën Mbretërinë e Danimarkës, tregon synimin strategjik të Trump për të zgjeruar praninë amerikane në Arktik. Kjo vjen në një kohë kur presidenti ka autorizuar një sërë operacionesh ushtarake në rajone të ndryshme të botës, duke përfshirë Venezuelën, ku ai pretendoi sukses në rrëzimin e Nicolas Maduros.

I pyetur mbi kufizimet e pushtetit të tij ushtarak global, Trump u përgjigj me një gjuhë që sfidon normat diplomatike: "Morali im është e vetmja gjë që mund të më ndalojë. Nuk kam nevojë për ligjin ndërkombëtar, por nuk dua të lëndoj njerëz."

Që nga fillimi i mandatit të tij të dytë, Trump ka autorizuar sulme ushtarake në vende si Irani, Iraku, Nigeria, Somalia, Siria dhe Jemeni, duke treguar një qasje tejet aktive dhe shpesh të njëanshme në politikën e jashtme.