Trumpi paralajmëron Iranin se “koha po harxhohet” për arritjen e një pakti bërthamor

Presidenti i Shteteve të Bashkuara, Donald Trump, ka paralajmëruar Iranin se koha po mbaron për negociatat rreth programit bërthamor të Teheranit, pas grumbullimit të forcave ushtarake amerikane në Gjirin Persik.

Kreu i Shtëpisë së Bardhë deklaroi se një “armadë masive” po lëviz “shpejt, me fuqi, entuziazëm dhe qëllim të madh” drejt Iranit, duke iu referuar një force të madhe detare amerikane, sipas televizionit BBC.

“Shpresoj që Irani do të vijë shpejt në tavolinë dhe të negociojë një marrëveshje të drejtë dhe të paanshme – JO ARMË BËRTHAMORE”

Trump shtoi se marina amerikane është “e gatshme dhe e aftë për ta përmbushur shpejt misionin e vet, me shpejtësi dhe dhunë, nëse është e nevojshme”.

Duke iu referuar sulmeve amerikane ndaj qendrave bërthamore të Iranit në qershor të vitit të kaluar, gjatë luftës 12-ditore mes Iranit dhe Izraelit, presidenti amerikan paralajmëroi: “Sulmi i radhës do të jetë shumë më i keq! Mos bëni që kjo të ndodhë përsëri.”

“Bërja e diplomacisë përmes kërcënimit ushtarak nuk mund të jetë efikase apo e dobishme. Nëse ata duan që bisedimet të marrin formë, pa dyshim se duhet t’i lënë anash kërcënimet, kërkesat e tepërta dhe ngritjen e çështjeve të palogjikshme.”

Si kundërpërgjigje, misioni i Iranit në Kombet e Bashkuara tha se Teherani “qëndron i gatshëm për dialog duke u mbështetur në respektin dhe interesat reciproke”, por nëse detyrohet, do ta mbrojë veten dhe “do të kundërpërgjigjet si kurrë më parë”.

Më herët, Ministri i Jashtëm iranian Abbas Araghchi kishte deklaruar se diplomacia nuk mund të bëhet përmes kërcënimeve ushtarake.

Të dhënat bazohen në lajmin e publikuar nga Nacionale dhe BBC.