Trump shpërthen kundër marrëveshjes së Britanisë për Ishujt Çagos: 'Akt i një budallallëku të madh'

Presidenti amerikan Donald Trump ka shpërthyer në një kritikë të fortë në platformën e tij Truth Social kundër marrëveshjes së fundit të Mbretërisë së Bashkuar për të transferuar sovranitetin e Ishujve Çagos te Mauritius.

Ai e ka cilësuar këtë lëvizje si një "akt të një BUDALLALLËKU TË MADH" dhe "dobësi totale", duke theksuar se kjo kërcënon interesat strategjike të SHBA-së, veçanërisht bazën ushtarake Diego Garcia në Oqeanin Indian.

“Në mënyrë tronditëse, Aleati ynë “gjenial” i NATO-s, Mbretëria e Bashkuar, aktualisht po planifikon të falë Ishullin Diego Garcia, vendndodhjen e një Baze Ushtarake vitale të SHBA-së, te Mauritiusi, dhe ta bëjë këtë PA ASNJË ARSYE. Nuk ka asnjë dyshim se Kina dhe Rusia e kanë vënë re këtë akt dobësie totale. Këto janë Fuqi Ndërkombëtare që njohin vetëm FORCËN, dhe kjo është arsyeja pse Shtetet e Bashkuara të Amerikës, nën udhëheqjen time, tani, pas vetëm një viti, respektohen si kurrë më parë. Fakti që Mbretëria e Bashkuar po fal një tokë jashtëzakonisht të rëndësishme është një akt i një BUDALLALLËKU TË MADH, dhe është një tjetër në vargun shumë të gjatë të arsyeve të Sigurisë Kombëtare se përse Groenlanda duhet të merret. Danimarka dhe Aleatët e saj Evropianë duhet TË BËJNË GJËNË E DUHUR. Ju faleminderit për vëmendjen tuaj ndaj kësaj çështjeje. PRESIDENTI DONALD J. TRUMP”

Kjo deklaratë shënon një kthesë dramatike nga pozicioni i tij i mëparshëm, kur sipas BBC-së, Trump kishte treguar gatishmëri për të mbështetur marrëveshjen e negociuar nga qeveria britanike.

Ishujt Çagos janë të rëndësishëm për sigurinë globale, pasi Diego Garcia strehon një bazë të rëndësishme ushtarake të SHBA-së. Trump paralajmëron se Kina dhe Rusia po e shfrytëzojnë këtë si shenjë dobësie dhe ripërsërit idenë për të marrë kontrollin e Groenlandës.