Trump me ultimatum serioz Kubës: “Bëni marrëveshje, para se të jetë tepër vonë”

Trump: \"Nuk do të ketë më naftë apo para për Kubën\"

Presidenti i Shteteve të Bashkuara, Donald Trump, i ka dërguar një paralajmërim të ashpër dhe të drejtpërdrejtë qeverisë së Kubës, duke kërkuar që ishulli të arrijë një marrëveshje me Uashingtonin përpara se të jetë \"tepër vonë\". Trump bëri të ditur se SHBA-ja do të bllokojë rrjedhën e naftës dhe parave që dikur shkonin drejt Kubës nga Venezuela.

Përmes një postimi në platformën e tij sociale, Truth Social, Trump theksoi se epoka e përfitimeve të Kubës nga pasuria e Venezuelës ka përfunduar.

“NUK DO TË KETË MË NAFTË APO PARA QË SHKOJNË NË KUBË - ZERO! Unë sugjeroj fuqimisht që ata të bëjnë një marrëveshje, PARA SE TË JETË SHUMË VONË.”

Venezuela ka qenë historikisht furnizuesi kryesor i energjisë për Kubën. Megjithatë, ndryshimet e fundit politike dhe presioni i shtuar amerikan mbi administratën e përkohshme në Caracas kanë sjellë një kthesë drastike. Sipas raportimeve, Trump ka arritur të ushtrojë presion mbi presidenten e përkohshme Delcy Rodriguez që nafta venezueliane të orientohet drejt Shteteve të Bashkuara në vend të ishullit komunist.

\"Kuba jetoi për shumë vite me sasi të mëdha nafte dhe parash nga Venezuela,\" shtoi Trump, duke e bërë të qartë se kjo linjë furnizimi tashmë është ndërprerë si pjesë e strategjisë së tij për të rritur presionin mbi regjimin e Havanës.