Dëshmi rrëqethëse nga Irani: “Vranë e vranë pa pushim”, bilanci i përgjakshëm i shtypjes së protestave

Një atmosferë lufte dhe terrori po mbretëron në rrugët e Iranit, ku forcat e sigurisë kanë ndërmarrë një fushatë brutale për të shtypur valën e protestave anti-qeveritare. Dëshmitarë okularë që kanë arritur të thyejnë murin e heshtjes, përshkruajnë skena tmerri ku protestues të paarmatosur qëllohen drejtpërdrejt me municion luftarak.

"E pashë me sytë e mi – ata qëlluan drejtpërdrejt në radhët e protestuesve dhe njerëzit ranë aty në vend", rrëfen Omid (emër i ndryshuar), zëri i të cilit dridhej nga frika e gjurmimit nga autoritetet. Ai tregon për BBC se në një qytet të vogël në jug të Iranit, forcat e sigurisë përdorën pushkë sulmi të stilit Kallashnikov kundër njerëzve që protestonin për vështirësitë ekonomike.

“Ne po luftojmë një regjim brutal me duar bosh.”

Situata raportohet të jetë rënduar veçanërisht pas paralajmërimit të Udhëheqësit Suprem, Ali Khamenei, i cili deklaroi se "Republika Islamike nuk do të tërhiqet". Pas kësaj deklarate, gjakderdhja në rrugë u intensifikua, me Trupat e Gardës Revolucionare Islamike (IRGC) që morën kontrollin e plotë të situatës.

Teherani si një fushë beteje: “Dita e Gjykimit”

Në kryeqytetin iranian, Teheran, banorët e përshkruajnë të enjten e kaluar si "ditën e gjykimit". Edhe lagjet më të largëta ishin të mbushura me protestues, por e premtja u kthye në një ditë të përgjakshme.

"Forcat e sigurisë vetëm vranë e vranë e vranë... E premtja ishte një ditë e përgjakshme", tregon një grua e re nga Teherani. Sipas saj, pas masakrave, njerëzit tani kanë frikë të dalin dhe thërrasin slogane anti-regjim nga rrugicat dhe dritaret e shtëpive të tyre.

Në qytetin Fardis, dëshmitarët tregojnë se forcat paraushtarake Basij sulmuan papritur me motoçikleta, duke qëlluar mbi këdo që u dilte përpara, përfshirë banorë që nuk ishin fare pjesë e protestave. "Dy ose tre persona u vranë në çdo rrugicë", pohoi një dëshmitar tjetër.

Izolimi dhe akuzat e regjimit

Në përpjekje për të fshehur shkallën e vërtetë të shtypjes, autoritetet kanë ndërprerë pothuajse tërësisht qasjen në internet. BBC Persian, që është i ndaluar të raportojë brenda vendit, thekson se raportimet që mbërrijnë pasqyrojnë vetëm një pjesë të vogël të numrit real të viktimave.

Në anën tjetër, regjimi i Teheranit ka akuzuar Shtetet e Bashkuara dhe Izraelin për nxitje të trazirave, duke i quajtur protestat si "veprime terroriste". Sidoqoftë, thirrjet për qëndresë nga figura si Reza Pahlavi, djali i shahut të fundit të Iranit, duket se kanë gjetur jehonë te një pjesë e madhe e popullsisë që po kërkon ndryshim rrënjësor.