Vuçiq refuzon delegacionin e Parlamentit Evropian: "Janë të paftuar, nuk kam kohë të humbas me ta"

Presidenti i Serbisë, Aleksandar Vuçiq, ka bërë të ditur se nuk do të takohet me delegacionin e Parlamentit Evropian (PE) që pritet të vizitojë Beogradin, duke i cilësuar ata si "të paftuar". Gjatë një vizite në Abu Dhabi, Vuçiq deklaroi se nuk e ka ndërmend të humbasë kohë me përfaqësuesit evropianë.

Vuçiq theksoi se gjatë kohës kur delegacioni do të jetë në Serbi (22-24 janar), ai do të jetë i angazhuar në Forumin Ekonomik Botëror në Davos. Megjithatë, ai sqaroi se edhe nëse do të ishte në Beograd, takimi nuk do të ndodhte.

“Urrejtësit e Serbisë u ulën dhe ranë dakord që do të vinin në Beograd dhe nuk na pyetën e as nuk na informuan. Ne nuk i thirrëm. Ata erdhën të paftuar. Nuk më shkon ndërmend të humbas kohë me ta.”

Presidenti serb specifikoi se nuk dëshiron të takohet me europarlamentarët si Tonino Picula apo Vladimir Prebiliç, duke shtuar se preferon të bisedojë vetëm me njerëz që "ia duan të mirën Serbisë". Kur u pyet për pasojat e mundshme diplomatike, Vuçiq u përgjigj me ironi se "do të ketë pasoja të tmerrshme", duke aluduar në deklarata apo rezoluta të reja nga ana e PE-së.

Në të njëjtën linjë me presidentin është shprehur edhe kryetarja e Parlamentit të Serbisë, Ana Brnabiq. Ajo konfirmoi se as ajo nuk do të takohet me delegacionin evropian, pasi gjatë asaj periudhe do të jetë në një vizitë zyrtare në Estoni. Misioni i Parlamentit Evropian do të qëndrojë në kryeqytetin serb për dy ditë, por duket se do të përballet me dyer të mbyllura nga krerët e shtetit.