Zelensky thirrje botës: Ndihmoni Iranin të çlirohet nga regjimi që solli të këqija

Presidenti i Ukrainës, Volodymyr Zelensky, i ka bërë thirrje komunitetit ndërkombëtar që të mbështesë popullin iranian në përpjekjet e tyre për ndryshim regjimi. Gjatë fjalimit të tij të fundit, Zelensky theksoi se bota nuk duhet ta humbasë momentin për të ndihmuar iranianët të çlirohen nga një pushtet që ka shkaktuar dëme si brenda vendit, ashtu edhe në skenën globale, përfshirë Ukrainën.

"Kryengritja" në Iran dhe lidhja me Rusinë

Zelensky i përshkroi protestat masive në Iran si një "kryengritje" legjitime. Sipas tij, kjo situatë duhet të shërbejë si një alarm për Rusinë që të rishikojë bashkëpunimin e saj të ngushtë ushtarak me Teheranin. Ai përmendi specifikisht përdorimin e dronëve iranianë "Shahed" nga forcat ruse, të cilët kanë luajtur një rol shkatërrues në luftën që po zhvillohet në Ukrainë tash e gati katër vite.

“Secili person normal në Tokë dëshiron shumë që populli i Iranit përfundimisht të jetë mjaftueshëm me fat për ta çliruar veten nga regjimi që ekziston atje dhe që ka sjellë shumë të këqija, përfshirë ato për Ukrainën dhe vendet e tjera.”

Bilanci i përgjakshëm i protestave

Sipas të dhënave nga grupi për të drejtat e njeriut HRANA, situata në Iran është kritike. Raportohet për të paktën 572 viktima dhe mbi 10 mijë të arrestuar që nga fillimi i protestave më 28 dhjetor. Ajo që nisi si revoltë kundër vështirësive ekonomike, tashmë është shndërruar në një kërkesë të hapur për largimin e udhëheqjes klerike të vendit.

Nga ana tjetër, marrëdhëniet mes Moskës dhe Teheranit janë forcuar ndjeshëm. Vitin e kaluar, Vladimir Putin dhe Masoud Pezeshkian nënshkruan një pakt strategjik 20-vjeçar, duke saktësuar një bashkëpunim edhe më të thellë ushtarak, i cili shihet me shqetësim të madh nga Kievi dhe aleatët perëndimorë.