Zjarri më i madh në historinë e Novi Pazarit

Zjarrfikësit në Novi Pazar, Serbi, që nga mesnata e djeshme po përballen me zjarrin më të madh në historinë e këtij qyteti, sipas tyre.

Sipas raportimeve të mediave lokale si klix.ba, zjarri ka shpërthyer rreth orës 2 të mëngjesit dhe ka përfshirë fabrikën tekstile EMA-TEX, guroren Musiq, si dhe disa magazina dhe depo materiale në zonën industriale të qytetit.

Tymi i dendur dhe flakët e larta ishin të dukshme nga pothuajse çdo pjesë e Novi Pazarit, duke shkaktuar panik mes banorëve.

“Bëhet fjalë për zjarrin më të madh që ka përfshirë ndonjëherë qytetin.”

Pas një beteje disaorëshe, zjarrfikësit kanë arritur ta vendosin zjarrin nën kontroll, por situata mbetet serioze dhe po monitorohet vazhdimisht.

Shkaku i saktë i zjarrit ende nuk dihet, por incidenti ka nxjerrë në pah rëndësinë e masave të sigurisë në zonat industriale.