Zvicra miraton planin për 31 miliardë franga shtesë në mbrojtje dhe siguri nga 2028

Këshilli Federal i Zvicrës ka njoftuar se do të ndajë 31 miliardë franga shtesë për shpenzimet e mbrojtjes dhe sigurisë duke filluar nga viti 2028. Për të mbuluar këto kosto, taksa mbi shitjet do të rritet me 0.8 për qind për një periudhë dhjetëvjeçare.

Sipas autoriteteve, ky vendim është i domosdoshëm për shkak të përkeqësimit të situatës gjeopolitike. Shpenzimet aktuale për ushtrinë nuk parashikohet të kalojnë 1% të PBB-së deri në 2032, por plani i ri synon të forcojë kapacitetet mbrojtëse të vendit.

"Bota është bërë më e paqëndrueshme dhe më e pasigurt dhe rendi ndërkombëtar i mbështetur në të drejtën ndërkombëtare është nën trysni", thekson qeveria zvicerane, duke iu referuar konflikteve si pushtimi rus i Ukrainës, rivalitetit mes SHBA-së dhe Kinës, si dhe tensioneve në Lindjen e Mesme.

““Bota është bërë më e paqëndrueshme dhe më e pasigurt dhe rendi ndërkombëtar i mbështetur në të drejtën ndërkombëtare është nën trysni””

Prioritetet e shpenzimeve përfshijnë investime në teknologjinë informative, sigurinë kibernetike, zbulimet elektromagnetike, policinë dhe mbrojtjen kufitare. Plani gjithashtu merr parasysh rritjen e kostove të armatimit për shkak të inflacionit dhe kërkesës së lartë globale.

Vendimi duhet të miratohet nga Kuvendi zviceran dhe mund të nënshtrohet një referendumi vitin e ardhshëm. Kjo nismë reflekton reagimin e vendeve evropiane ndaj sfidave të reja të sigurisë.