Alban Zogaj: LDK nuk është parti e rrjeteve sociale
Anëtar i LDK-së, Alban Zogaj, thekson se partia drejtohet nga institucionet, jo nga presioni në rrjetet sociale, duke mbrojtur sjelljen demokratike të Lumir Abdixhikut.
Anëtar i Lidhjes Demokratike të Kosovës (LDK), Alban Zogaj, ka deklaruar se partia nuk është e rrjeteve sociale, por e institucioneve të saj. Kjo deklaratë vjen në mes të debateve të nxehta brendore pas ofertës së dorëheqjes së kryetarit Lumir Abdixhiku në Kuvendin e partisë.
“LDK nuk është parti e rrjeteve sociale, por e institucioneve të saj. Lumir Abdixhiku e ka ofruar dorëheqjen në mënyrën më korrekte dhe më demokratike, në Kuvendin e LDK-së, aty ku merren vendimet. Kjo është sjellje institucionale dhe e përgjegjshme.”
Zogaj ka paralajmëruar se çdo përpjekje për ta imponuar largimin e kryetarit përmes presionit publik, fyerjeve apo fushatave të orkestruara është e rrezikshme për LDK-në dhe për demokracinë e saj të brendshme.
"LDK ka nevojë për reflektim, analizë dhe unitet, jo për linçim dhe përçarje. Vendimet i merr Kuvendi i LDK-së. Ashtu siç duhet në një parti serioze", ka shkruar Zogaj në Facebook.
Kjo reagim vjen në vazhdim të krizës brendore në LDK pas zgjedhjeve të fundit, ku partia regjistroi rezultate më të dobëta se pritshmëritë. Dorëheqja e Abdixhikut është ofruar në Kuvend, duke lënë vendimin te institucionet partiake.
