Analistët kritikojnë Abdixhikun për gjuhën e ashpër: “Reagim i panevojshëm dhe populist”
Analistët Imer Mushkolaj dhe Visar Ymeri kanë goditur diskursin e kryetarit të LDK-së, Lumir Abdixhiku, duke e quajtur reagimin e tij ndaj mediave si populist dhe të ngjashëm me atë të VV-së.
Analistët kritikojnë Abdixhikun për gjuhën ndaj mediave
Analistët politikë Imer Mushkolaj dhe Visar Ymeri kanë kritikuar ashpër diskursin e fundit të kryetarit të Lidhjes Demokratike të Kosovës (LDK), Lumir Abdixhiku. Reagimi i tij në mbrojtje të deputetit Besian Mustafa, i cili u përball me kritika pas deklaratës për votimin e Hashim Thaçit si president, po cilësohet si i panevojshëm dhe jodemokratik.
Mushkolaj ka theksuar se gjuha e përdorur nga Abdixhiku është e njëjta që dikur dënohej kur vinte nga zyrtarët e Lëvizjes Vetëvendosje. Sipas tij, kjo është një përpjekje për të zhvendosur përgjegjësinë për dështimet e partisë te faktorët e jashtëm.
“Ky ishte një reagim i panevojshëm, me një gjuhë të papranueshme. Kjo është gjuhë që ne vazhdimisht e kemi dënuar në studio televizive, sidomos kur ka ardhur nga zyrtarë të Vetëvendosjes. Për humbjen e LDK-së nuk kanë faj as mediat, as gazetarët e as opinionistët. Ka faj vetë LDK-ja.”
Nga ana tjetër, Visar Ymeri e ka cilësuar qasjen e Abdixhikut si tipike populiste, duke krijuar një ndarje artificiale mes partisë dhe kritikëve. Ymeri u shpreh se etiketimi i kritikave si "të porositura" pa fakte është i rrezikshëm për një parti që pretendon të jetë liberale dhe demokratike.
“Kjo gjuhë është përngjasim i një tendence të ndarjes së shoqërisë në mes të 'NE' dhe 'ATYRE', që është mekanizëm bazë i populizmit. Kjo nuk i shkon një partie demokratike që synon një shoqëri liberale. Jo secili që nuk pajtohet me ty është i shtirë nga dikush ose i paguar nga dikush.”
Diskutimi u zhvillua në RTV Dukagjini, ku mund të ndiqni edhe analizën e plotë përmes videos më poshtë:
