Lumir Abdixhiku homazh në Reçak: Drejtësia për masakrën do të kërkohet gjithmonë

Kryetari i Lidhjes Demokratike të Kosovës (LDK), Lumir Abdixhiku, së bashku me strukturat e partisë, ka marrë pjesë në homazhet në Kompleksin Memorial të Reçakut, për të përkujtuar 45 civilët e masakruar brutalisht nga forcat paramilitare serbe më 15 janar të vitit 1999.

Ajo që ndodhi në Reçak u quajt një tronditje jo vetëm për Kosovën, por edhe për botën. Abdixhiku nënvizoi se sakrifica e të rënëve për liri dhe pavarësi nuk do të harrohet kurrë, dhe se drejtësia për këtë krim do të jetë prioritet i përhershëm.

“Sot shënojmë dhe njëkohësisht nderojmë viktimat e masakrës së Reçakut, një nga ngjarjet më tragjike të kontinentit të Evropës, së historisë moderne të Evropës. Në mëngjesin e hershëm të 15 janarit, 45 civilë – burra, gra, të rinj e të reja, fëmijë e të moshuar – u masakruan nga forcat paramilitare serbe, duke dhënë një tronditje ndërkombëtare... Reçaku nuk harrohet, drejtësia për Reçakun gjithmonë do të kërkohet.”

Abdixhiku falënderoi edhe rolin e figurave ndërkombëtare si ambasadori William Walker, i cili dokumentoi krimin dhe ndihmoi në ndërgjegjësimin e bashkësisë ndërkombëtare. Kjo ngjarje ishte kulmi i krimeve serbe në Kosovë dhe një pikë kthese drejt intervenimit të NATO-s.

Sot, në prag të 27-vjetorit, Reçaku vazhdon të jetë simbol i rezistencës dhe padrejtësisë. Prokuroria Speciale e Kosovës ka ngritur aktakuza kundër ish-pjesëtarëve serbë, por sfida për drejtësi mbetet e madhe.

LDK-ja, si një forcë kryesore politike, vazhdon të angazhohet për ruajtjen e kujtesës historike dhe avancimin e proceseve të drejtësisë tranzitore.