Analistët: Mungesa e monitorimit gjatë numërimit hap rrugë manipulimeve

Analistët politikë kanë shprehur shqetësim të thellë për manipulimet e zbuluara pas rinumërimit të votave në zgjedhjet e fundit në Kosovë. Sipas tyre, kjo situatë del në pah si pasojë direkte e mungesës së monitorimit të duhur gjatë fazës së numërimit.

Manipulimet me vota nuk janë fenomen i ri, por kësaj radhe kanë dalë hapur në pah. Dallavere të tilla, vjedhje vote dhe përfshirje të personave të dënuar janë raportuar edhe në zgjedhje të mëparshme, por mungesa e vëzhgimit ka lejuar përkeqësimin e situatës.

Sadik Zeqiri, analist politik, thekson se procesi zgjedhor është dëmtuar rëndë dhe se ndryshimi urgjent i Ligjit për Zgjedhjet është i domosdoshëm.

““Ligji për zgjedhjet duhet të ndryshohet sa më parë, sepse përndryshe krijohen keqpërdorues. Ndodh që votuesi voton për disa persona, por nuk i kujton të gjithë. Unë nuk shoh një organizim të mirëfilltë të njerëzve të mençur që kanë ndikuar te komisionerët, por kjo ka ndodhur si një dukuri shoqërore, e cila fatkeqësisht ka ndikuar në dëmtimin e kandidatëve””

Zeqiri shton se monitorimi gjatë numërimit është përgjegjësi e Komisionit Qendror të Zgjedhjeve (KQZ), por as organizatat vendase e as ato ndërkombëtare nuk kanë ushtruar vëzhgim të mjaftueshëm në këtë fazë kritike.

Analistët e quajnë të domosdoshme forcimin e mekanizmave të monitorimit dhe reformën ligjore për të mbrojtur integritetin e votës qytetare dhe për të shmangur dëmtimin e kandidatëve të ndershëm.