Arrestohen dy të rinj për vjedhje në institucione arsimore në Viti
Policia e Kosovës ka arrestuar dy të dyshuar meshkuj për vjedhje të rënda në tri institucione arsimore në komunën e Vitisë, ku janë vjedhur laptopë, iPad-a, projektorë dhe mjete pune.
Arrestohen dy të rinj për vjedhje në institucione arsimore në Viti
Policia e Kosovës ka arrestuar dy të dyshuar meshkuj nën dyshimin për kryerjen e disa vjedhjeve të rënda në tri institucione arsimore në komunën e Vitisë.
Sipas njoftimit të Policisë së Kosovës, me datë 15 janar 2026, Njësia e Hetimeve të Stacionit Policor në Viti ka identifikuar dhe arrestuar M.J. (lindur 2002) dhe B.K. (lindur 2006), të dyshuar për bashkëveprim në këto vjedhje.
Të dyshuarit dyshohen se kanë vjedhur një sasi të konsiderueshme pajisjesh teknologjike dhe mjetesh pune, duke përfshirë laptopë, iPad-e, projektorë dhe objekte të tjera nga tre lokacione të institucioneve arsimore në Viti.
Gjatë kontrollit në dy lokacione me urdhër gjykate, policia ka gjetur dhe konfiskuar dëshmi materiale relevante, të cilat pas verifikimeve janë konfirmuar si të vjedhura nga këto raste.
“Të dyshuarit janë intervistuar në prani të avokatëve dhe me vendim të Prokurorit të Shtetit janë dërguar në mbajtje për 48 orë.”
Hetimet po vazhdojnë për zbardhjen e plotë të rasteve, ndërsa të arrestuarit do të paraqiten sërish para gjyqtarit të detyrës për masa të mëtejshme.
Raportohet nga IndeksOnline.
