Arrestohet një komisioner i NDS-së në Prizren për dyshime në manipulim votash

Në një aksion të koordinuar të Policisë së Kosovës dhe Prokurorisë Themelore të Prizrenit, sot është arrestuar një komisioner zgjedhor i partisë Nova Demokratska Stranka (NDS), e udhëhequr nga Emilja Rexhepi. Ai akuzohet për manipulim me vota gjatë zgjedhjeve lokale të 28 dhjetorit 2025.

Lajmin e ka konfirmuar për media avokati i të arrestuarit, Blend Gjini, i cili ka deklaruar se arrestimi është i pabazuar ligjërisht dhe pa prova konkrete.

““Sot është arrestuar komisioneri i partisë NDS të Emilja Rexhepit, me pretendimin për veprën penale të manipulimit të provave. Si avokat mbrojtës, kam shfrytëzuar të drejtën që klienti im të mbrohet në heshtje. Ajo që është e çuditshme është fakti se nuk ekziston asnjë provë që partia e Emilja Rexhepit të ketë pasur rritje apo ulje të votave””

Gjini ka apeluar te kryetarja e NDS-së që të dalë në mbrojtje të komisionerëve të saj.

““Pres që vetë ministrja Rexhepi të reagojë dhe t’i mbrojë njerëzit e saj që kanë punuar për partinë. Vepra penale me të cilën ngarkohet komisioneri nuk ka të bëjë me manipulimin që pretendon prokuroria."”

Avokati ka theksuar se kërkesa për dorëzimin e telefonit të klientit ka qenë e pazakontë, por u plotësua në shenjë bashkëpunimi. “Konsideroj se klientit tim i është bërë një padrejtësi”, ka përfunduar ai.

Autoritetet nuk kanë dhënë detaje të mëtejshme për rastin, ndërsa hetimet janë në vazhdim. Ky zhvillim vjen në kontekstin e zgjedhjeve të fundit lokale, ku janë raportuar disa parregullsi në disa komuna.