AUV: Produktet e kafesë në Kosovë të sigurta, pas alarmit për brendin Monaco nga Devolli
Agjencia e Ushqimit dhe Veterinarisë konfirmon sigurinë e kafesë vendore pas njoftimit RASFF për nivele të larta akrilamidë në brendin Monaco eksportuar në Kroaci nga Devolli Corporation. Analizat tregojnë nivele nën kufirin e lejuar.
Agjencia e Ushqimit dhe Veterinarisë (AUV) ka bërë të ditur se të gjitha produktet e kafesë në tregun e Kosovës janë të sigurta për konsum dhe operatorët mund të vazhdojnë tregtimin normal.
Pas një njoftimi të marrë përmes Sistemit të Alarmimit të Shpejtë për Ushqim dhe Ushqim për Kafshë (RASFF), AUV-ja ka kryer analiza të plota laboratorike. Njoftimi kishte të bënte me praninë e niveleve të larta të akrilamidës në brendin “Monaco”, të prodhuar nga Devolli Corporation dhe eksportuar në Kroaci.
Në përputhje me Planin Vjetor të Inspektimit, AUV ka inspektuar dhe analizuar të gjitha brendet e kafesë për konsum të brendshëm dhe eksport.
“Sipas standardeve të sigurisë ushqimore, rezultatet e analizave konfirmojnë se nivelet e akrilamidës janë nën kufirin maksimal të lejuar.”
"Operatorët e bizneseve ushqimore mund të vazhdojnë tregtimin e kafesë. AUV do të vazhdojë monitorimin për garantimin e sigurisë ushqimore," thuhet në njoftimin zyrtar.
Akrilamida formohet gjatë përpunimit termik dhe mund të jetë e rrezikshme në nivele të larta, por analizat tregojnë se kafja jonë është brenda normave.
