Avokati Shkëlzen Sopjani paralajmëron dënime deri në 5 vite burg për operatorët e skemës së votave

Avokati Shkëlzen Sopjani ka folur hapur për manipulimet e mundshme në procesin e rinumërimit të votave në zgjedhjet lokale, duke paralajmëruar dënime të ashpra për të gjithë të përfshirët.

Në emisionin 'Ditari' të televizionit T7, ai ka theksuar rëndësinë e identifikimit të operatorëve të kësaj skeme, të cilët dyshohet se janë anëtarë të Komisionit Qendror të Zgjedhjeve (KQZ) ose delegatë partiakë.

““Duhet të dal të shihet kush kanë qenë operatorët e kësaj skeme, kush i ka koordinuar dhe organizuar. Këta operatorë janë shumë të rëndësishëm që prokuroria t’i gjejë dhe t’i dënojë, sepse kemi të bëjmë me antarë të KQZ-së apo të deleguar të partive. Për këtë, dënimi është shumë serioz, së paku 3 deri në 5 vite burg””

Sopjani ka vënë në dukje se Partia Demokratike e Kosovës (PDK) ka regjistruar ulje të konsiderueshme të votave për kandidatët e saj, sidomos në Prishtinë.

““Ka mundësi që kjo situatë të përsëritet edhe në dy apo tre komuna të tjera, siç ka ndodhur në Prishtinë. Nëse e shohim PDK-në edhe si ekip dhe si lojtar të renditjes, ata kanë marrë disa nga humbjet kryesore,””

Ai ka bërë thirrje që institucionet kompetente të zbardhin çdo parregullsi dhe të sigurojnë ndëshkimin e përgjegjësve, duke ruajtur integritetin e procesit zgjedhor.