DnV: Rinumërimi i plotë i votave është i pashmangshëm – hetimet të përfshijnë edhe kandidatët

Organizata joqeveritare Demokracia në Veprim (DnV) ka reaguar ashpër një javë pas publikimit të gjetjeve fillestare të rinumërimit të votave preferenciale, duke theksuar se shmangia e rinumërimit të plotë po thellon krizën e besimit në integritetin e procesit zgjedhor.

Devijime të konsiderueshme janë evidentuar jo vetëm në komunat ku u bë rinumërim i plotë, por edhe në pjesën e mostrës prej 10% të vendvotimeve. Kjo tregon se fenomeni nuk është i izoluar dhe rinumërimet selektive nuk mund të japin vlerësim të saktë të shtrembërimit të votës.

““Vetëm një rinumërim i plotë i votave preferenciale në të gjitha komunat mund të sigurojë se vullneti i votuesve është reflektuar saktë dhe se nuk ka vendvotime të mbetura jashtë verifikimit””

DnV vlerëson se rinumërimi i pjesshëm nuk garanton besueshmërinë e rezultateve përfundimtare dhe mbetet mënyra e vetme për të rikthyer besimin publik dhe mbyllur dilemat mbi legjitimitetin e tyre.

Hetimet të shtrihen te kandidatët

Paralelisht, DnV kërkon që organet e drejtësisë të trajtojnë çështjen me prioritet përmes një hetimi gjithëpërfshirës në nivel vendi. Hetimi duhet të kalojë përtej nivelit teknik dhe të përfshijë kandidatët që rezultojnë përfitues nga mospërputhjet.

““Modelet e përsëritura të devijimeve në favor të kandidatëve të caktuar krijojnë dyshime të arsyeshme se këto nuk janë pasojë e gabimeve njerëzore apo rastësisë, por e veprimeve të qëllimshme.””

Organizata paralajmëron se kandidatët duhet të sqarojnë nëse kanë nxitur, koordinuar apo janë përfshirë direkt apo indirekt në manipulimin e votës.

Kjo deklaratë vjen në kontekstin e debateve të nxehta për parregullsitë në zgjedhjet e fundit lokale, ku figura të ndryshme politike kanë kërkuar rinumërim të plotë.