PËRDITËSIM: Arrestohet komisioner i NDS-së në Prizren për dyshime keqpërdorimi votash, reagon Emilija Redzepi: Po sulmohem politikisht

Policia e Kosovës, në bashkëpunim me Prokurorinë Themelore të Prizrenit, ka zhvilluar një operacion në rajonin e Prizrenit për dyshime të keqpërdorimit të votave gjatë zgjedhjeve të fundit lokale.

Sipas informacioneve, në mesin e të arrestuarve është një komisioner i partisë boshnjake NDS. Avokati i tij, Blend Gjini, ka thënë se arrestimi është i paligjshëm dhe pa prova të mjaftueshme.

““Është arrestuar për manipulim të votave, nuk ka asnjë provë që lidhet me këtë çështje të manipulimit. Është e çuditshme për mua si avokat, imponimi i dorëzimit të telefonit menjëherë. Klienti e ka dorëzuar telefonin vullnetarisht dhe arrestimit. Arrestimi është i paligjshëm””

Liderja e NDS-së, Emilija Redzepi, ka reaguar ashpër ndaj raportimeve në media, duke i cilësuar ato si sulme të orkestruara politike ndaj saj.

“"Prej qindra personave të dyshuar e të arrestuar, në media sot po lakohet me titull që është arrestuar një komisioner i imi. Ky është sulm i qëllimshëm për të më dëmtuar mua. Përgjegjësia është individuale dhe secili person mbanë përgjegjësi për veprimet e tij. Avokatët duhet me respektu etikën e punës dhe nuk duhet të më targetojnë mua në media. E turpshme se si krejt mediat kanë humbur profesionalizmin dhe kanë vendosur foton time në ballinat e tyre. Pse nuk publikohen lajmet për arrestimin e komisionerëve të PDK-së ku vjedhja e votave kap shifrën me mijëra sosh"”

Redzepi thekson se përgjegjësia është individuale dhe akuzon mediat për mungesë profesionalizmi, duke krahasuar me raste të ngjashme të partive të tjera.

Hetimet vazhdojnë dhe autoritetet presin të zbardhin më shumë detaje rreth këtij operacioni të rëndësishëm për integritetin zgjedhor në Prizren.