Haradinaj kërkon rinumërim në gjithë Kosovën: Procesi i këtyre zgjedhjeve është lënduar
Kryetari i AAK-së, Ramush Haradinaj, ka reaguar ashpër ndaj manipulimeve të zbuluara në rinumërimin e pjesshëm të votave, duke kërkuar numërim të plotë në të gjithë vendin dhe aktivizimin e Prokurorisë.
Haradinaj kërkon rinumërim të plotë të votave në të gjithë Kosovën
Kryetari i Aleancës për Ardhmërinë e Kosovës (AAK), Ramush Haradinaj, ka dalë me një reagim të fortë pas zbulimeve të manipulimeve me votat e kandidatëve për deputetë gjatë rinumërimit në disa komuna.
Sipas tij, rinumërimi i pjesshëm po nxjerr në pah një skemë manipulimi të madhe, që kërcënon integritetin e zgjedhjeve të 28 dhjetorit. Haradinaj ka kërkuar që votat të rinumërohen një për një në të gjithë Kosovën.
““Procesi i këtyre zgjedhjeve qysh sot është lënduar dhe pas këtyre gjetjeve, vota duhet të rinumërohet një për një. Pa rinumërim të tërësishëm, nuk sigurohet integriteti i këtyre zgjedhjeve””
Ai ka shprehur habinë pse Prokuroria nuk është vënë ende në lëvizje për të hetuar këto parregullsi. Haradinaj ka apeluar te të gjithë mekanizmat për të mbrojtur votën e qytetarëve.
““Demokracia nuk mund të jetë viktimë e një grushti hajdutësh. Apeloj tek të gjithë mekanizmat që me vendimet e veprimet e tyre ta mbrojnë votën e qytetarit dhe ta rikthejnë integritetin e zgjedhjeve të 28 Dhjetorit. Çdo drejtim tjetër do të kishte pasoja të pariparueshme!””
Kjo deklaratë vjen në kontekstin e zhvillimeve të fundit ku rinumërimi në komuna si Prizreni ka zbuluar mijëra vota të dyshimta, kryesisht te kandidatë të PDK-së, duke ushqyer dyshime për falsifikime të gjera. Disa ekspertë tashmë kanë kërkuar rinumërim të plotë.
AAK ka siguruar 6 deputetë në Kuvendin e ri, por Haradinaj insiston se pa verifikim të plotë, legjitimiteti i rezultateve mbetet i komprometuar.