Haradinaj kërkon rinumërim të plotë të votave: Demokracia nuk mund të jetë viktimë e një grushti hajdutësh

Kryetari i Aleancës për Ardhmërinë e Kosovës (AAK), Ramush Haradinaj, ka dalë me një deklaratë të fuqishme në rrjetet sociale, ku kërkon rinumërim të plotë të votave në zgjedhjet e 28 dhjetorit.

Sipas tij, rinumërimi i pjesshëm ka nxjerrë në pah manipulime të mundshme të përmasave shqetësuese, duke lënduar procesin zgjedhor që nga fillimi.

““Procesi i këtyre zgjedhjeve qysh sot është lënduar dhe pas këtyre gjetjeve, vota duhet të rinumërohet një për një. Pa rinumërim të tërësishëm, nuk sigurohet integriteti i këtyre zgjedhjeve.””

Haradinaj ka kritikuar ashpër mosreagimin e Prokurorisë dhe ka bërë thirrje drejtpërdrejt te mekanizmat e drejtësisë dhe institucionet për të mbrojtur votën e qytetarëve.

““E habitshme qysh Prokuroria nuk është vënë në lëvizje qysh sot. Demokracia nuk mund të jetë viktimë e një grushti hajdutësh.””

Ai ka paralajmëruar se çdo veprim tjetër mund të ketë pasoja të pariparueshme për integritetin demokratik të vendit.

Kjo deklaratë vjen në kontekstin e ankesa të shumta për parregullsi në procesin zgjedhor, duke e bërë çështjen e rinumërimit një temë qendrore në debatin politik aktual në Kosovë.