Hoxhaj paralajmëron: Ndryshime të mëdha gjeopolitike, 2026 vit i rrezikshëm për Ballkanin
Ish-ministri i Jashtëm i Kosovës, Enver Hoxhaj, thekson se protestat në Iran janë kryengritja më e madhe e dy dekadave dhe paralajmëron për një vit kritik për Ballkanin në 2026, për shkak të zhvillimeve në Evropë.
Hoxhaj: Protestat në Iran, momentum historik për Lindjen e Mesme
Ish-ministri i Punëve të Jashtme të Kosovës, Enver Hoxhaj, ka vlerësuar lart protestat aktuale në Iran si kryengritjen më të madhe politike të dy dekadave të fundit. Sipas tij, kjo situatë përbën një moment vendimtar jo vetëm për iranianët, por për të gjithë Lindjen e Mesme.
"Ajo që po ndodh në Iran është protesta dhe kryengritja më e madhe politike që është bërë në këto 20 vitet e fundit", ka deklaruar Hoxhaj, duke u bazuar në kontaktet e tij me diasporën iraniane.
“Jam më se i bindur që nëse populli i Iranit do të qëndron në rrugë, do t’i marrin institucionet, do ta bëjnë betejën e tij politike, mund të përmbyllet ndryshimi politik.”
Hoxhaj thekson se Irani po humb gradualisht ndikimin rajonal, ndërsa fuqizimi i Izraelit, Arabisë Saudite dhe shteteve të Gjirit, si dhe tërheqja e Rusisë, po krijojnë një hapësirë të re për Perëndimin.
2026, vit i vështirë për Ballkanin dhe Evropën
Në kontekst rajonal, Hoxhaj paralajmëron se viti 2026 do të jetë i rrezikshëm për Ballkanin, Kosovën dhe Evropën. Ai shpreh shqetësim për ndryshimet politike në Gjermani, Francë dhe Britani të Madhe, ku mund të vijnë në pushtet forca si AfD apo Le Pen, pa interes për Ballkanin.
“Viti 2026 është një vit i vështirë për Ballkanin, mund të jetë një vit i vështirë edhe për Kosovën, mund të jetë një vit i vështirë edhe për Evropën.”
"Prandaj do të jetë një vit i cili në veten e tij paraqet një dramë të madhe dhe një ndryshim të madh", ka përfunduar Hoxhaj në intervistën e tij në Syri TV.
Këto deklarata vijnë në një moment tensioni gjeopolitik global, ku zhvillimet në Lindjen e Mesme mund të kenë pasoja të drejtpërdrejta për stabilitetin rajonal.
