Kush janë personat që dyshohet se plagosën biznesmenin Jeton Buquku në Pejë? (EMRAT)
Policia ka identifikuar tre persona nga Deçani si të dyshuar për plagosjen e biznesmenit Jeton Buquku në Pejë. Të dyshuarit ndodhen në arrati.
Identifikohen të dyshuarit për plagosjen e biznesmenit në Pejë
Policia e Kosovës ka arritur të identifikojë tre personat që dyshohet se janë autorë të plagosjes së biznesmenit Jeton Buquku, ngjarje kjo që ndodhi dje në qytetin e Pejës. Autoritetet po e trajtojnë rastin si vrasje në tentativë, ndërsa të dyshuarit ndodhen ende në arrati.
Sipas burimeve nga strukturat hetimore, tre personat e identifikuar janë të gjithë nga fshati Maznik i Komunës së Deçanit:
- Arjan Misin Qelaj, i lindur në vitin 1981.
- Yll Arjan Qelaj, 23 vjeç.
- Altin Rifat Qelaj, i lindur në vitin 2005.
Incidenti i rëndë raportohet të ketë përfshirë një rrahje brutale dhe përdorimin e armës së zjarrit ndaj Buqukut. Biznesmeni fillimisht mori ndihmën e parë në Spitalin Rajonal të Pejës, për t’u transferuar më pas në Qendrën Klinike Universitare të Kosovës (QKUK) në Prishtinë për trajtim të mëtutjeshëm.
Mësohet se gjendja shëndetësore e Jeton Buqukut është stabilizuar dhe ai është jashtë rrezikut për jetën.
Policia po kryen hetime intensive dhe bastisje për lokalizimin e të dyshuarve. Hetuesit nuk përjashtojnë mundësinë që operacioni të çojë në arrestime të shpejta ose në identifikimin e personave të tjerë që mund të kenë qenë të përfshirë në këtë ngjarje që tronditi Pejën.
