Irani pretendon kontrole të plotë pas protestave të përgjakshme, Araghchi: Jemi të gatshëm për luftë e negociata

Situata në Iran është cilësuar si “nën kontroll të plotë” nga autoritetet në Teheran, pas një fundjave të përgjakshme që pa një rritje dramatike të dhunës gjatë protestave mbarëkombëtare. Ministri i Jashtëm Iranian, Abbas Araghchi, u deklarua të hënën lidhur me zhvillimet e fundit, duke dërguar sinjale të dyfishta drejt komunitetit ndërkombëtar dhe Uashingtonit.

Mes luftës dhe diplomacisë

Gjatë një konference me ambasadorët e huaj në Teheran, Araghchi theksoi se Republika Islamike nuk po kërkon konflikt, por është e përgatitur për çdo skenar. "Republika Islamike e Iranit nuk po kërkon luftë, por është plotësisht e përgatitur për të," u shpreh ai, duke shtuar se vendi mbetet i hapur për negociata, me kusht që ato të bazohen në respekt të ndërsjellë dhe të drejta të barabarta.

Ky reagim vjen si kundërpërgjigje ndaj paralajmërimeve të fundit të presidentit të SHBA-së, Donald Trump. Ky i fundit u shpreh të dielën se Irani kishte propozuar bisedime pas kërcënimeve të tij për goditje ushtarake si reagim ndaj shtypjes së dhunshme të demonstruesve.

Bilanci tragjik i dy javëve protesta

Sipas të dhënave nga Agjencia e Lajmeve të Aktivistëve të të Drejtave të Njeriut (HRANA), situata në terren mbetet tejet e rëndë. Raportet tregojnë se numri i të vdekurve ka arritur në të paktën 544 persona. Prej tyre, 496 ishin demonstrues, ndërsa 48 pjesëtarë të personelit të sigurisë.

Përveç viktimave, mbi 10,600 persona janë arrestuar gjatë dy javëve të fundit në valën më të madhe të pakënaqësisë që po trondit Iranin. Donald Trump, duke folur nga Air Force One, pretendoi se "Irani dëshiron të negociojë" pasi "janë të lodhur duke u goditur nga Shtetet e Bashkuara."

“Republika Islamike e Iranit nuk po kërkon luftë, por është plotësisht e përgatitur për luftë.”