Kërcënimet e Trump për Groenlandën: BE-ja shqyrton tarifa 93 miliardë euro ndaj SHBA-së

Bashkimi Evropian po diskuton një kundërpërgjigje të ashpër ndaj deklaratave dhe kërcënimeve të Presidentit të SHBA-së, Donald Trump, në lidhje me Groenlandën.

Sipas raportimeve të Financial Times, Brukseli po shqyrton mundësinë e vendosjes së një pakete tarifash në vlerën e 93 miliardë eurove, si masë hakmarrëse ndaj njoftimeve amerikane, si dhe opsionin e kufizimit ose përjashtimit të kompanive amerikane nga tregu i BE-së.

“Këto instrumente synojnë t’u japin liderëve evropianë më shumë ndikim në takimet vendimtare me presidentin amerikan.”

Burime të përfshira në përgatitjen e këtyre masave bëjnë me dije se lista e tarifave është hartuar që vitin e kaluar, por zbatimi i saj ishte pezulluar deri më 6 shkurt, për të shmangur një përshkallëzim në një luftë të plotë tregtare mes dy palëve.

Riivënia në diskutim e kësaj pakete është shqyrtuar nga 27 ambasadorët e vendeve anëtare të BE-së, së bashku me përdorimin e të ashtuquajturit “instrument anti-konkurrues”, i cili mund të kufizojë aksesin e kompanive amerikane në tregun e brendshëm evropian.

Takimet në Davos, vendimtare

Këto masa synojnë të ndikojnë në takimet vendimtare me Trump gjatë Forumit Ekonomik Botëror në Davos këtë javë. Vendimi përfundimtar do të varet nga zhvillimet diplomatike dhe qëndrimi i Uashingtonit në ditët në vijim.

Tensionet rreth Groenlandës, ishullit strategjik danez, kanë eskaluar pas interesit të përsëritur të Trump për ta marrë atë, duke e konsideruar si të domosdoshëm për sigurinë kombëtare amerikane kundër Kinës dhe Rusisë.