Përfundon numërimi i votave nga diaspora, KQZ drejt shpalljes së rezultateve finale

Komisioni Qendror i Zgjedhjeve (KQZ) ka njoftuar përmbylljen e procesit të numërimit të të gjitha votave për zgjedhjet e parakohshme parlamentare të mbajtura më 28 dhjetor 2025. Hapi i fundit u hodh në orët e para të mëngjesit të së premtes, kur u numëruan fletëvotimet e fundit të ardhura me postë nga diaspora.

Zëdhënësi i KQZ-së, Valmir Elezi, konfirmoi se në Qendrën e Numërimit dhe Rezultateve (QNR) tashmë është mbyllur i gjithë cikli i numërimit. Kjo shënon fundin e pritjes për të kuptuar vullnetin e plotë të qytetarëve, përfshirë edhe ata që jetojnë jashtë Kosovës.

“Me përfundimin e numërimit të këtyre fletëvotimeve, KQZ është e gatshme për të shpallë rezultatin përfundimtar të zgjedhjeve të parakohshme të mbajtura më 28 dhjetor.”

Megjithatë, shpallja e menjëhershme e rezultateve mund të shtyhet për një kohë të shkurtër për shkak të procedurave ligjore. Sipas Ligjit për Zgjedhjet e Përgjithshme, subjektet politike dhe kandidatët kanë një afat prej 48 orësh për të parashtruar ankesa në Panelin Zgjedhor për Ankesa dhe Parashtresa (PZAP) lidhur me procesin e numërimit në QNR.

Pasi të trajtohen të gjitha ankesat e mundshme dhe të vërtetohen rezultatet nga PZAP, KQZ do të bëjë shpalljen zyrtare të rezultateve përfundimtare, e cila do të hapë rrugën për certifikimin e tyre dhe konstituimin e Kuvendit të ri të Kosovës.