KQZ shpjegon pse nuk po rinumërohen ende votat në Podujevë
Zëdhënësi i Komisionit Qendror të Zgjedhjeve, Valmir Elezi, ka dhënë shpjegime për vonesën në rinumërimin e votave në Podujevë, duke thënë se procesi ka kaluar komunën përkohësisht për të vazhduar në të tjera, por së shpejti do të kthehet.
Komisioni Qendror i Zgjedhjeve (KQZ) ka sqaruar situatën lidhur me rinumërimin e votave në komunën e Podujevës, ku deri më tani janë rinumëruar vetëm 11 nga 110 vendvotime.
Sipas platformës zyrtare të KQZ-së për rezultatet, ky proces ka mbetur i pandryshuar që para datës 19 janar 2026.
Zëdhënësi i KQZ-së, Valmir Elezi, ka dhënë shpjegimet për Express, duke thënë se rinumërimi i pjesshëm u krye për rreth 10% të vendvotimeve në Podujevë, në përputhje me vendimin e parë të KQZ-së.
““Para datës 19 janar 2026 nga komuna e Podujevës janë rinumëruar rreth 10% e vendvotimeve, në përputhje me vendimin e parë të KQZ-së për rinumërim të pjesshëm. Pas marrjes së vendimit të dytë për rinumërim të plotë në të gjitha vendvotimet, procesi kishte kaluar komunën e Podujevës dhe po zhvillohej në komuna të tjera, sipas renditjes së paraparë””
Elezi ka shtuar se procesi po vazhdon me intensitet të plotë dhe nga pasdita e së mërkurës është vendosur të përfshihen vendvotimet e të gjitha komunave pa u ndaluar te renditja e mëparshme.
““Ky proces po vazhdon me intensitet të plotë dhe deri më tani është zhvilluar sipas renditjes së komunave, por nga pasdita e së mërkurës, me qëllim të përshpejtimit të rinumërimit, është vendosur që të përfshihen vendvotimet e të gjitha komunave dhe jodomosdoshmërisht sipas renditjes. Pra, së shpejti edhe vendvotimet tjera nga kjo komunë dhe nga tjerat do të përfshihen në rinumërim””
Kështu, qytetarët e Podujevës presin që rinumërimi i plotë të nisë së shpejti, në kuadër të procesit të përgjithshëm të verifikimit të rezultateve të zgjedhjeve të 28 dhjetorit 2025.