Kurti pret Admiralin Wikoff: Anëtarësimi në NATO, garancia kryesore për sigurinë e Kosovës

Kryeministri i Kosovës, Albin Kurti, ka zhvilluar një takim zyrtar me Admiralin amerikan George M. Wikoff, Komandant i Komandës së Forcave të Përbashkëta Aleate të NATO-s në Napoli. Ky takim, i pari mes tyre, u përqendrua në bashkëpunimin strategjik dhe situatën e sigurisë në rajon.

Gjatë bisedës, Kurti vlerësoi lart rolin e NATO-s dhe misionit të KFOR-it në Kosovë, duke theksuar se komunikimi i rregullt me qeverinë është jetik për garantimin e paqes për të gjithë qytetarët. Ai potencoi se Kosova është një "rrëfim suksesi" i ndërhyrjes së aleancës veri-atlantike, ku liria dhe pavarësia kanë shërbyer si themel për zhvillimin demokratik dhe ekonomik.

“Anëtarësimi i plotë i Kosovës në NATO është përgjigjja më e mirë për paqen e qëndrueshme, stabilitetin afatgjatë dhe sigurinë në rajon. Siguria e Kosovës fillon me sigurinë e kufijve të saj.”

Kryeministri e informoi Admiralin Wikoff edhe për progresin në sundimin e ligjit dhe luftën kundër krimit të organizuar. Po ashtu, u diskutua për rritjen e investimeve në sektorin e mbrojtjes, duke rikonfirmuar aspiratën e qartë të Kosovës drejt integrimit në strukturat euro-atlantike.

Admirali Wikoff u falënderua për kontributin e tij dhe u sigurua për gatishmërinë e institucioneve të Kosovës për bashkëpunim të plotë e të ngushtë me forcën paqeruajtëse të udhëhequr nga NATO.