Maia Sandu: Do të votoja për bashkimin e Moldavisë me Rumaninë nëse do të kishte referendum

Presidentja e Moldavisë, Maia Sandu, ka deklaruar hapur se do të votonte pro bashkimit të vendit të saj me Rumaninë, nëse një propozim i tillë do të hidhej në referendum. Kjo deklaratë vjen si një reagim ndaj presioneve në rritje nga Rusia dhe sfidave që ka një vend i vogël për të ruajtur demokracinë dhe sovranitetin.

Gjatë një interviste për podkastin britanik "The Rest is Politics", Sandu ka theksuar se situata globale po e bën gjithnjë e më të vështirë mbijetesën e demokracive të vogla përballë agresionit të jashtëm.

“Shikoni se çfarë po ndodh në botë. Po bëhet gjithnjë e më e vështirë për një vend të vogël si Moldavia të mbijetojë si demokraci, si vend sovran dhe sigurisht t'i rezistojë Rusisë.”

Moldavia, një ish-republikë sovjetike me rreth 2.4 milionë banorë, ka një histori të gjatë dhe komplekse me Rumaninë. Gjatë periudhës ndërmjet dy luftërave botërore, ajo ishte pjesë e Rumanisë, por u aneksua nga Bashkimi Sovjetik gjatë Luftës së Dytë Botërore. Sot, shumica e popullsisë flet rumanisht, ndërsa rreth 1.5 milionë moldavë tashmë zotërojnë shtetësi rumune.

Integrimi në BE mbetet objektivi primar

Pavarësisht qëndrimit të saj personal, Sandu e pranon se ribashkimi me Rumaninë nuk gëzon mbështetjen e shumicës së qytetarëve. Sondazhet e fundit tregojnë se vetëm rreth një e treta e popullsisë e mbështet këtë ide. Prandaj, ajo e vlerëson anëtarësimin në Bashkimin Evropian si një "objektiv më realist".

Qeveria pro-evropiane e Moldavisë synon anëtarësimin e plotë në BE deri në vitin 2030. Megjithatë, kjo rrugë kërkon reforma të thella dhe përballje me pengesat që vijnë nga forcat politike pro-ruse brenda vendit, të cilat ishin në pushtet deri në vitin 2020.

Për Moldavinë, bashkimi me Rumaninë do të thoshte integrim i menjëhershëm në BE dhe NATO, duke ofruar kështu një ombrellë sigurie që vendi aktualisht nuk e ka përballë ambicieve të Kremlinit në rajon.