Sandu e qartë: Do të votoja për bashkimin e Moldavisë me Rumaninë
Presidentja e Moldavisë, Maia Sandu, ka deklaruar se do të votonte pro bashkimit me Rumaninë në një referendum, duke e parë këtë si një mundësi për të mbrojti demokracinë nga presioni i Rusisë.
Maia Sandu: Bashkimi me Rumaninë si rrugë drejt sigurisë
Presidentja e Moldavisë, Maia Sandu, ka bërë një deklaratë të fuqishme sa i përket të ardhmes së vendit të saj, duke u shprehur e hapur për një bashkim të mundshëm me Rumaninë. Në një kohë kur presioni rus mbi ish-republikën sovjetike po rritet, Sandu thotë se do të votonte pro këtij bashkimi nëse do të mbahej një referendum popullor.
Gjatë një paraqitjeje në emisionin britanik "The Rest is Politics", e transmetuar këtë të diel, Sandu theksoi vështirësitë që ka një shtet i vogël si Moldavia për të mbijetuar si demokraci sovrane përballë agresivitetit të Moskës. E pyetur drejtpërdrejt për mundësinë e bashkimit me fqinjin e tyre anëtar të BE-së dhe NATO-s, ajo ishte e qartë.
“Nëse kemi një referendum, unë do të votoja për bashkimin me Rumaninë. Po bëhet gjithnjë më vështirë që një shtet i vogël si Moldavia të mbijetojë si demokraci, si shtet sovran, dhe, natyrisht, t’i rezistojë Rusisë.”
Realiteti politik dhe sfidat e integrimit
Pavarësisht mbështetjes së saj personale, Presidentja Sandu pranoi se aktualisht shumica e moldavëve nuk e ndajnë këtë vizion. Sondazhet e fundit tregojnë se rreth një e treta e popullsisë mbështet bashkimin, ndërkohë që rreth 1.5 milionë qytetarë moldavë tashmë posedojnë shtetësi rumune.
Për Sandun, rruga më "realiste" mbetet anëtarësimi i drejtpërdrejtë në Bashkimin Evropian, një proces që qeveria e saj synon ta përmbyllë deri në vitin 2030. Megjithatë, kjo rrugë është e mbushur me pengesa, duke përfshirë reformat e thella të nevojshme dhe kundërshtimin e ashpër nga forcat pro-ruse brenda vendit, të cilat ishin në pushtet deri në vitin 2020.
Moldavia, me rreth 2.4 milionë banorë, ndan një histori të gjatë me Rumaninë, duke qenë pjesë e saj mes dy luftërave botërore përpara se të aneksohej nga Bashkimi Sovjetik. Që nga fitimi i pavarësisë në vitin 1991, vendi ka luajtur një balancë të brishtë mes Perëndimit dhe Lindjes, por agresioni rus në Ukrainë ka përshpejtuar orientimin e saj pro-evropian.
