Manipulimi i votave në Prizren: Kryeprokurori autorizon policinë për hetime

Procesi i rinumërimit të votave në Prizren ka nxjerrë në pah gabime të shumta dhe diferenca të mëdha në numrin e votave të kandidatëve për deputetë, duke alarmuar autoritetet ligjore.

Si pasojë, Prokuroria Themelore e Prizrenit ka vendosur të veprojë me shpejtësi. Petrit Kryeziu, kryeprokurori i kësaj prokurorie, ka dhënë sot autorizim me shkrim për Policinë e Kosovës që të nisë hetimet për manipulimet e dyshuara në procesin zgjedhor.

““Sot në cilësinë e kryeprokurorit, me vetiniciativë kam lëshuar autorizim me shkrim për Policinë e Kosovës që të identifikojnë personat përgjegjës, të sigurojnë prova relevante, përfshirë procesverbalet dhe nënshkrimet,””

Kryeprokurori Kryeziu ka theksuar se çdo individ i përfshirë në ndryshimin e rezultateve të votës ose falsifikimin e dokumenteve do të përballet me përgjegjësi penale të plotë.

““Çdo person që ka vendosur nënshkrimet e tij duke falsifikuar rezultatet zgjedhore dhe duke ndryshuar vullnetin e qytetarit, nuk duhet të qëndrojë i qetë, do të mbajë përgjegjësi të plotë penale,””

Ai ka paralajmëruar se manipulimi i votës dhe falsifikimi i dokumenteve zgjedhore janë krime të rënda që do të ndëshkohen pa kompromis.

Prokuroria e Prizrenit ka nisur një hetim të plotë për zbulimin e çdo shkeljeje, me qëllim garantimin e integritetit të procesit zgjedhor. Ky zhvillim vjen në kontekstin e dyshimeve të shumta për parregullsi në zgjedhjet e fundit, veçanërisht në Prizren.

Në vazhdim do të raportojmë për zhvillimet e mëtejshme të këtij hetimi.