Mbi 700 shkelje rrugore evidentohen nga veturat inteligjente në Prishtinë

Brenda një jave të plotë aktivitetesh, Policia rajonale e Prishtinës ka shqiptuar 5,398 masa administrative me gjobë për shkelje të ndryshme të Kodit Rrugor. Prej tyre, 753 raste janë evidentuar falë teknologjisë së avancuar, përfshirë veturat inteligjente dhe radarët mobilë.

Kjo u bë e ditur përmes një njoftimi zyrtar të Policisë së Prishtinës. Gjatë kësaj periudhe, nëpërmjet aksioneve të ndara dhe në lokacione të ndryshme, janë realizuar gjithashtu 141 urdhëresa të gjykatës, prej të cilave 38 për vepra penale dhe pjesa tjetër për kundërvajtje, seanca dhe verifikime.

Në përputhje me këto urdhëresa, pas përfundimit të procedurave policore, personat e dënuar me burgim janë dërguar për vuajtje të dënimit, ndërsa ata me gjoba janë liruar pasi kanë kryer obligimet e parapara.

Sekuestrohen 9 armë zjarri

Aktivitetet e Policisë nuk janë kufizuar vetëm te trafiku. Brenda të njëjtit hark kohor, janë sekuestruar 9 armë zjarri të llojeve dhe kalibrave të ndryshëm, si dhe municione të ndryshme. Këto veprime tregojnë për një angazhim të shtuar në forcimin e sigurisë publike në kryeqytet.

Policia e Prishtinës vazhdon të jetë e angazhuar në parandalimin e shkeljeve dhe forcimin e rendit, duke përdorur teknologjinë moderne për të rritur efikasitetin e kontrolleve rrugore.