PDK: Vota e qytetarëve është e shenjtë, çdo cenim apo manipulim i votës është i papranueshëm

Partia Demokratike e Kosovës (PDK) ka shprehur shqetësimin e saj lidhur me procesin e rinumërimit të votave në disa komuna të Kosovës, ku janë raportuar parregullsi të ndryshme.

Në një deklaratë zyrtare, PDK ka theksuar se vota e qytetarëve është e shenjtë dhe çdo përpjekje për cenim apo manipulim të saj është e papranueshme dhe shkel parimet demokratike.

“Për ne si subjekt politik, indikacionet për cenim apo manipulim të votës janë të papranueshme. Vota e qytetarëve është e shenjtë dhe çdo trajtim jokorrekt ose përpjekje për manipulim shkel parimet demokratike që ne mbrojmë.”

Partia ka bërë të qartë se standardi i tyre është trajtimi i barabartë dhe i kujdesshëm i çdo vote, nga momenti i hedhjes deri në certifikimin përfundimtar.

PDK u bën thirrje organeve kompetente, përfshirë Komisionin Qendror të Zgjedhjeve (KQZ), të zbardhin çdo dyshim dhe të garantojnë që rezultati përfundimtar të jetë pasqyrë e saktë e vullnetit qytetar.

“Eliminimi i çdo dyshimi është në interes të kandidatëve, institucioneve dhe qytetarëve.”

Partia rikonfirmon përkushtimin e saj të palëkundur për integritetin e procesit zgjedhor dhe respektimin e votës së qytetarëve.

Ky reagim vjen në kontekstin e rinumërimit të votave në 914 vendvotime, ku janë evidentuar mospërputhje të mëdha, sidomos në Prizren ku PDK ka humbur mijëra vota.